Аварияртту хъанахъаву чан хъанай дакъар цуксса ялув бавцIуну бухьурчагу ГИБДД-лул зузалт федерал паччахIххуллурдай. Ми ххуллурдал тагьардания ряхва зурул лажиндарай чув ци хьуссарив жухьва буслай ур федерал батальондалул командир ДПС ГИБДД МВД-лул полициялул полковник Висир-Паша МахIаммадов.

ХIурмат лавайсса дагъусттанлувтал!
Дагъусттан Республикалул ДПС-лул къуллугърал зузалт зузиссар ГИБДД-лул МВД-лул тIалавшиннардайн бувну къуццу тIий.
ЗахIматшивурттавун къабагьан мугъаятшивуртту щаллу дуллай бунугу ялагу чан къахъанай дур ДТП-ртту. КIира кварталданий 2013 шинал паччахIххуллурдай хьуну дур 176 авария, миккугу ливтIуну бур 82, лихха-личча хьуну азарханардайн багьну бур 206 инсан.

[pullquote]Ларгсса шинал вара чIумал хьуну диркIун дур 220 авария, миннувугу ливтIуну бивкIун бур 91 ва лихха-личча хьуну ивкIун ур 355 инсан. Вай хIасиллайн бувну жунма бувчIлай бур ряхва зурул мутталий хьусса зарал биявуртту чансса-дунугу дукIунияр гьашину чанну душиву. [/pullquote]

Циняв хьусса авариярттал анализ дуллай паччахIххуллурдал лахъишиврий ва шагьрурдал ва районнал ххуллурдай гьарца нюжмардий жу дувайссар миннун хасъсса оперативно-профилактический давуртту, микку кIул бувайссар ххуллурдал правилартту къадурурччуну дурсса хъинну оьккисса низамлиявуртту хьусса кIанттурду, бувччу хьуну рульданух щябивкIун бивкIсса кIанттурду, хьунив ххуллийн буккан, цаннаяр ца хьхьичIун буккан буллай бивкIсса хIарачатру, цивгу ххуйну къуртал къавхьуну аварияртту дуван багьана хьусса.
Гьарца чIумалгу, ми мероприятияртту дуллалисса чIумалгу жул зузалтрал канилу дуссар миннал давурттан хасъсса приборду, цалгу ккаккан дувайсса анаварну най усса-акъасса, чIалачIи байсса хьхьичIун уклай, хьунив ххуллурдайн ххяхлай нанисса машинартту. ЦIанасса чIумал батальондалучIа буссар урчIва машина «Форд» цилгу кка­ккан дувайсса кIай ялув кIицI ларгсса приборду. Уттигу ялун ххи дурну дур мукуннасса тамансса приборду «Визир» тIисса. Вай «Визир», «Бинар», «Искравидео 2М» прибордал кумаграйну чIярусса низамлиявуртту ккаккан дан бюхълай бур шупиртуран. Вайннул тасттикь бувмур миннаща инкар бан бюхълай бакъар, вай дакъахьурча бяст-ччаллихун багьавуртту чIяру хъанан дикIай, цалвамур бацIан буллай шупиртурал. Ялунгу ххину жун итадаркьунни архниятура анаваршиву чIалачIи дувайми приборду «Арена» тIисса, 10 комплект. Мугъаятшивуртту ва ххуллурдайсса апатIру къашаву мурадрайсса цалва хьхьичI бивхьусса масъалартту биттур буллай ва батальондалул зузалтрал гьурттушиврийну ялун личин дурссар диялсса тахсиркаршивуртту, машинартту бацавуртту, бавцусса халкь. Дагъусттан Республикалул МВД-лул ГИБДД ДПС-лул личIисса батальондалул зузалтрал ялун личин дурну дур 1 июньдалия 30 июньдалийн дияннин гьашину (2013 ш.) 844 низамлиявуртту къавкъиншивурттугу хIалану (хьхьичIмур шинал вара чIумал — 657).
Буцин хьунссар цаппара мисаллу:
— зерххуну дур ярагъ ва ярагъунницIун дархIусса ккулла-янсав – 20-хъул, дукIусса шинал 19-ра.
— лявкъуну бур бакъа хьусса документру – 397 иш, дукIусса шинал лявкъуми – 87 иш.
— ялун личин бувну бур номерду баххана бувсса 57 иш. (дукIуми – 65 иш).
— лявкъуну бур луглай бивкIсса бавцусса машинартту – 52-хъул. (ДукIу вара чIумал – 39-ва). Вайгу чIявуми хIисав хъанай бур багьлул ххирасса чил хIукуматрал машинартту.
Яла чIяруну хьунадакьайсса машинарттал ххуллурдайсса апатI шавуртту.
— 107 иш куннийн ку щусса, миннувугу ливтIуну бур 42 инсан, азарханардайн багьну бур – 161 инсан.
— 28 ахьния багьаву, миккугу ливтIуну бур 14 инсан, щавурду дирну бур 28 инсаннайн. Вай хIакъи-хIисавртту дуллалисса чIумул мутталий оьрчIру хIаласса аварияртту ххуллурдай хьуну дур 13, миннувугу 5-ва оьрчI бусса кIанай къуртал хьуну бур, 9-ва оьрчIан цIунцIия хьуну азарханардайн биян бувну бур, (дукIу вара чIумал 17-7-16).
Ххуллурдай аварияртту къа­хьуншиврул, хьумигу захIматшивурттавун къадагьаншиврул аьркинссар:
— гьарца кьини бацIан буван патруль аварияртту гьарзану шай­сса кIанттурдай кунничIан ку гъан бувну;
— гьарца нюжмардий ОММ-рал гужирдайну ОБДПС-лул дуллан ялув бацIавуртту цивппа зузи­сса кIанттурдай ва лагма-ялттусса кIанттурдай;
— прибордал кумаграйну гьарца низамлиявуртту ялун личин дуллан;
— школардай, садикир­ттаву оьрчIахь буслан, радио-телевидениярттай, рекламалуву ккаккан дуллан ххуллурдал низам ва мугъаятну бикIан аьркиншивуртту;
— ххуллурдайсса объектирттахь – ттучаннахь ва м.ц. чирахъирттал чанна лахъан бувну ххуллурду чIалачIи буваву хьхьунил чIумал.
Ва макьалалул ахирданийгу учин ччай ура, жул зузалтрал ссайчIав хIайп къаувкуну хIарачат бантIиссар ва буллайгу буссар зул мугъаятшиву дуруччин ва ттиния тихуннайгу дуручлантIиссар яла лаваймур шачIанттуйн диянцIа.
В.-П. МахIаммадов,
ДР-лул МВД-лул ОБДПС ГИБДД-лул полициялул
командир
Таржума З.Аьбдуллаевал