Ларгсса нюжмар кьини «Лакрал район» МР-данул бакIчи Юсуп МахIаммадов, КIулшиву дулаврил управлениялул хъунама Явсупи ХIамзаев, Гъумучиял шяраваллил администрациялул бакIчи Апанни Макьаев, ШавкIуллал шяраваллил администрациялул бакIчи Аьбдул Аьлиев, СПК-лул хъунама Шяъван ХIусайнов бувкIун бия школалийн, юбилейрайнсса хIадуршинна ци даражалий дурив ххал дан.

Зулайхат Тахакьаева
Бувну бур хIаятрал ва спортплощадкалул дянихсса чIира. Школалул хьхьичIух, 180 кв. метралийх бувтIуну бур цемент. Москавливсса ишбажаранчи ХIажи ХIажиевлул дуллусса арцух шяравухсса ххуллучIату школалучIан ва хIаятравух 350 метралийх бувтIуну бур асфальт.
Дяних пластика дирхьуну учительский кабинет кIибавчIуну, гиву директорнал кабинет бувну бур. Ялагу мукунма кIибавчIуну бур гьартасса цаймигу кабинетру. Байбихьулул классраву дишинсса нузгу, ва классравух ва учительский кабинетравух бакьинсса халичарттугу буллуну бур Оьруснал театрданул директор Ризван Асадуллаевлул.
Ремонт дурну дур классир­ттаву, жанахIраву. ЦIу дурну Совет Союзрал вирттаврал стендру, вайннулла чIарав дурну дур ттигъанну Буршай экстремистурал бивтун бивчусса полицанал зузалтран хас дурсса стендгу. Мукунна цIу дурну дур Хъун дяъвилул хъирив­сса шинал архсса Аьрасатнал шагьрулия шяравун бувкIун, шиккува кIанттулгу хьуну, 45 шинай оьрчIан кIулшиву ва тарбия дуллай бивкIсса оьрус учительница Роза Жалаеван хас дурсса ва школалул оьрмулия бусласисса стендругу.
ЦIу-цIусса стендру дурну дур хасъсса дарсирдал кабинетир­ттавугу. Яла-яла чIюлу бувну бур цIусса стандартру цалчин ишла дуллай байбивхьусса Учуева Оксанал каялувшиннаралусса шамилчинмур классрал кабинет. Учительницал бусласимунийн бувну, ШавкIрав детсад бакъахьувкун, школалийн букIлакIисса оьрчIру бусса бур дагьайссаксса хIадуршинна дакъасса. Мунийн бувну, дуклаки оьрчIал нитти-буттал кумаграцIух ванил классраву сакин бувну бур оьрчIру бялахълансса мурцIу. Шамилчинмур классравун занан тIий ур 5 дуклаки оьрчI. Вайннава шама хъинну итххявхсса бур, ваймигу лапва хьхьарасса бакъар, мунийн бувну цIусса стандартрай дуклан вайннан жапану бакъар, — тIий бур Оксана Учуева.
Ва кьини увкIун ия Аьрасатнал Конституцион судрал судья, ШавкIуллал школалун цIа дирзсса ХIадис ХIажиевлул арснал арс ХIадис ХIажиев. Ванал школалул кьатIухсса чIирайн лархъунни ХIадис ХIажиевлул аьпалул ула, цувгу тIитIинтIиссар юбилейрал шадлугърал лагрулуву.