Фестивальданул шамулчинмур кьини хьуна яла ххаришивурттал дурцIумургу, цува фестивальданул сиптачи ва арцу харж дуву Къаллаев Оьмари фестивальданийн увкIсса кьинину. ХьхьичIмур фестивальданул кIилчинмур кьини аваза бия, ваца Оьмари Къаллаев Дагъусттаннал чIумуйнусса Президент Рамазан АьбдуллатIиповлущал учIан авцIуну ур тIар тIий. КъаувкIуна Президент, увкIуна ххаллилсса, ка тIиртIунасса зунттал чув, Оьмари Къаллаев.

Фестивальданул бахшишру дуллалисса лахIзалувух гьуртту хъанай бия МахIачкъалалия бувкIсса хIурмат лавайсса хъамал: Да­гъусттаннал Халкьуннал Творчествалул Къатлул директор МухIадова Марита, Дагъус­ттаннал ВРГК-телевидениялул хъунаманал хъиривчу Ссалам Хавчаев, цIадурксса художник Кьурбанаьли МахIаммадов, МахIачкъала шагьрулул администрациялул хъунаманал хъиривчу Магьди Айналов, Ккуллал райондалул муниципал сакиншиннарал хъунама Сяид Сулайманов, фестивальданул сиптачи Оьмари Къаллаев, шанна кьини фестивальданул конкурсралми давурттал сакиншинна цайнна ларсъсса, композитор Мазагьиб Шарипов, шаннагу кьинисса ва гала-концертрал режиссер Эмиль Кьурбанов, лакрал цIадурксса макьанну руцай мандолинарду буву МахIаммад Хавчаев, шанна кьини буххаву цирив къакIулну сахIналул заллухъруну бивкIсса Аслан МахIаммадов ва Марианна МахIаммадова.
Фестивальданул лауреатътал хьуминнан дуллай бия медаль, диплом, чIурлил хъуннасса бушкъап, арцуйнусса бахшиш ва хъунмасса тIутIал кацI.
Вай кIицI дурсса бахшишру дулун Оьмари Къаллаевлун кумаг буллай бия ялув кIицI лавгсса инсантал. МахIаммад Хавчаевлул укунсса сий дусса фестиваль Ккуллал райондалий дуллай тIий цала чулуха Ккуллал райондалун бахшиш бувуна цала каних бувсса мандолина. Ва буллуна Сяид ХIасниевичлухьхьун. Цинявннал, куртIсса пикрирдал шеъриятрал зумунусса мяъна цалва ихтилатраву бивхьуну, барчаллагь тIий бия Дагъусттаннал халкьуннал пагьму-гьунар ялун личин буллалисса фестиваль цалла жиплива дуллалисса Оьмари Къаллаевлухь. Укунсса дакIнил заллу дунияллийн уккан увсса нинугу, тарбия дуллусса миллатгу дунияллий яла дакIурдил аваданмур нинугу, миллатгу бушиву тасттикь буллай бия. «Оьмари Къаллаевлуя эбрат ларсун, Дагъусттаннал цайми чиваркIунналгу дулланхьуви ваниха лархьхьусса давурттив»,- тIий бия. Да­гъусттаннал ва къумасса зунттал неххал ца лахърулий дирхьусса Хъювхъиял шяраваллил цивппа хIайран буллай бушиврияту ва Хъювхъиял шяраваллил инсантурал дунияллух бургаву авадансса душиврияту буслай бия. «Жун шиккусса чарттащалва дус хьун ччай бур»,- тIисса лирикалул зумунусса ихтилатру бия. Дарбант шагьрулия бувкIсса Аьлиева Гульмира Хъювхъиял шяравалу ххуй дизаврия: «На шикку дача дуван бучIанна, ттула оьрчIангу шиччасса душру щар буцинна»,- тIий дакI кIидачIлай бия. Яла рязимийрив тамашачитал бия. Конкурсравух гьуртту къахьурчагу ххуй-ххуйсса балайрду увкуна ЦIуссалакрал культуралул къатлул зузалал Аьлиева Розал. Мазагьиб Шариповлул оьвкуну хъамалу увцу­сса Хаирбек Асланбековлул мукун ца ххуйну лазги мазрай балай увкунахха, ттул чIарав щябивкIсса тамашачитал бия: «Ваксса ххуйсса балайчи бакI кIяла хьуннин чу лаивтун иявав жула Мазагьиблул?»,-тIий. Буниялагу чув иявав?
Гьай-гьай, фестивальданул лауреатътал хьуминнал ккаккан дуруна ххуйра-ххуйсса гала-концерт. ЦIан лакьлан дикIайхту, Хъювхъиял шяравалу фейерверкрал ссурулккуртлуйн дуккан дурну магьлул шяраваллийн кIура лаган дуруна. Яшасун, Лакку билаят! Яшасун, Хъювхъий!
Фестивальданул балайрдал ва къавтIавурттал масъалартталсса буллалисса Аьрасатнал искусствалул лайкь хьусса ишккакку, композитор Мазагьиб Шариповлущалсса ихтилат:
— Ина кIийлла дурунни ва фестивальданул сакиншинналул даву. Цукун ларгри ирглийсса фестиваль?
— Фестиваль дуллай байбивхьуссар 2002-ку шиная шиннай. Гьашину 2013 –ку шинал дуллалимур хъанахъиссар 7-мур фестиваль. БакIраяту фестивальданий гьуртту хъанай бивк1хьурча лакралми балайчитал ва къавтIалт, утти гьуртту хъанай буссар щалвагу Дагъусттаннал балайчитал ва къавтIалт. ХIа­тта фестиваль фольклорданул зумунусса духьурчагу, гьуртту хъанай бивкIссар «Дагъусттаннал цIанин лайкь хьусса артисталгума». Гьашину масалдаран гьуртту хъанай бур 12 райондалия бувкIсса коллективру.17 инсан цакуну гьуртту хъанахъисса коллектив бур Ахвахуллал райондалия. Гьай-гьай, кIира шинал дянив цIусса талант ялун личин бюхъайхьурчагу, талант му таксса гьунар бухьувкун, чIявусса гьунарду бусса балайчитал бур учингурив къахьунссар. Амма аьлтта чIалай бур оьрчIал конкурсирттаву пагьму-гьунарду бусса оьрчIру цалнияр цал чIяву хъанай бушиву. Масалдаран, Гъумучатусса Аида Садикьова щак бакъа ялун личин тIисса пагьму бусса балайчи бур. КIицI дуван ччива Оьмари Къаллаевлул дуллалисса ва даву кьимат бищун хъинну захIматсса, бусравсса даву душиву. Шикку Хъювхъиял шяраву фестиваль дуллалаву дакъагу 40 инсан шанма гьантлий Москавлив увцуну, тийх концерт ккаккан дуван бувну лащу-щаллу був­ссар. Жула пикрирдал луртама, улу ваналмунияр ссуссукьусса дур учингума бучIир. Циван учирча уну тIий Оьмари Къаллаев хъинну хьхьичIунайну оьрмулухгу, миллатрал культуралухгу уруглагисса аькьлукар. Ялагу чара бакъа укунсса зат кIицI буван ччива, цукунчIав ва даву творчествалун хIисавсса духьувкун ишккаккултрал масъаларттавух хIала къауххай. Ца лауреатътал хьуминнан бахшиш дулаву дакъагу, циняв шиккун оьвкуну бувкIсса хъамал утту бишайсса къатрал чулуха дузал баврищал, ява шанна кьини дукралулгур дузал бувайсса. Жунмагу ванаха лащан хIарачат буван багьлай бур.
Фестивальданий гьуртту хъанахъиминнан кьиматру бихьлай бивкIсса жюрилул хъунаманащал, «Аьрасатнал цIанин лайкь хьусса учитель»,- Барият Мурадовал цIанийсса культуралул ва искусствалул колледжрал учитель Жидалаев КьурбанмахIаммалущалсса ихтилат:
— Цукун най дия зул жюрилул даву?
— Цаймий шиннардих бурувгун гьашину гьуртту хъанахъисса коллективртту гьарта-гьарзасса бур. Улу 40 гьурттучи усса бия ца коллектив. Гьунардал чулуха цалнияр цал чIяву хъанай бур. Винмагу ккавкхьунссар арула балайчи ия «Халкьуннал балайлуву» ца кьяйдасса кьиматру лавсъсса. Яла жун багьунни музыка къабивщунма ми балайрду тIутIи буван. Учиннуча «перепев» дуван. Ялагу шанмагу кIану кIи-кIиннайх бачIин багьунни. Мукунсса гужсса бяс-ччал бия.