Июль зурул 22-нний Дагъусттаннал Президентнал къуллугъ чIумуйну бартбигьлагьисса Рамазан АьбдуллатIиповлул каялувшиврийну хьунни Дагъусттаннал социал-экономикалул масъалартту ххалбигьлагьисса совещание.
Микку гьурттушинна дунни Халкьуннал Мажлисрал председатель Хизри Шихсаэдовлул, хIукуматрал вакилтурал, депутатътурал ва муниципалитетирттал хъуниминнал.
Совещаниялул дайдихьу дуллалисса ихтилатраву Р. АьбдуллатIиповлул увкунни: «ХIукуматрал заседаниялий жура цIакь дурссия республикалул оьрму хьхьичIунмай баву мурадрайсса 10 проект. Мура заседаниялий на хIукуматрайн тапшур бувссия ми проектру бартдигьавриха чялишну зун. Гьарцагу нюжмардий ми проектру бартдигьаврил даву ссайн дирну дуссарив ххалбигьлагьисса даву дуллан аьркинссия хIукуматрал вакилтурал. Му даву цукун най дуссарив бусан бувар ттухь уттигу, яъни даврил хIасиллу уттигу ттучIан диян дурассар. Ччима министрнахь дурсса даврил цIухху-бусу булларча, мяълумну дурмунил хавар бакъассар. Ца цичIар дурну дакъар газрал щаллушинна давриву, балугъирттал отраслилуву, цайми сферардавугу. ДачIи шинал хIасиллу дуллалисса документирттах урувгра на, укун зузаврия пайда бакъассар. ЩийнчIав дяъван ччай акъара, на хIукму бував хIукумат отставкалийн тIайла дуккан».
ХIукуматрал хъунаманал къуллугъ чIумуйну тапшур бувна Анатолий Карибовлуйн. Мунайн тапшур бувна кьува гьантлул дянив хIадур дуван хIукуматрал дачIи шинай дурсса даврил ва президентнал проектру бартдигьаврил хIасиллу.
Р. АьбдуллатIиповлул бувсуна хIасул дуллалишиву цIусса структура – Экспертизалул ва проектное управлениялул давриха зунтIисса Президентнал Управление. Бувсуна му Управлениялул гьарца нюжмардий президентнал проектру бартдигьаврил даврил мониторинг дуллантIишиву, шагьрурдал ва районнал хъуниминнангу ми проектру бартдигьлан ка-кумаг буллантIишиву. «На чIявусса инсантуращал маслихIат ккаккав хIукумат отставкалийн дуккан даврил хIакъираву, ххуйну пикри буллай ивкIра. ЧIявуми бия ттухь сентябрь зуруйннин ацIу тIий, маслихIат буллалисса. На ацIавиявхха, Дагъусттаннаща къашайссар сентябрьданийннин яхI буллан, царагу кьини аьдада гьан дуллан къабучIиссар жунма», — увкуна Р. АьбдуллатIиповлул. Мунал бувсуна хIасул дуллалишиву цамургу цIусса идара — ОАО «Корпорация развития Республики Дагестан» ва му зунтIишиву инвестициярдаха ва цаймигу агьамсса масъалартту щаллу бавриха.
Республикалул парламентрал спикер Хизри Шихсаэдовлулгу кIицI лавгуна хIукуматрал зунсса ххуйсса шартIру дунура, хайр-мюнпатрансса проектру цIакь дурну дунура, лябуккулийсса ва сантирайсса даву чIалай дакъашиву.
Гьаз бувна совещаниялий шагьрулул округирттал кIанттул самоуправлениялул ва муниципал районнал даврил масъаларттугу. Социал-экономикалул хIасиллу хIисавравун ларсун, хьхьичIунсса кIанттурду буллуна цаппара районнан.
Лахъзунтталми районнал дянив цалчинмур кIану буллуна Лакралмур райондалун. Совещание къуртал дуллай Р. АьбдуллатIиповлул бувсуна Республикалул Конституциялул кьини, июль зурул 26-нний Халкьуннал дусшиврул Къаттагу тIитIин дакIний бушиву, му давриву цаламур бутIа бишин, ка кIидахIин маслихIат бувна министртуран, предпринимательтуран. Бувсуна му иширан цала 500 азарда къуруш дуллушиву.
«Халкьуннал Дусшиврул къатта тIитIаву хас дуллалиссару Дагъусттан Аьрасатнал паччахIлугъравун бувххун 200 шин шаврин, жура-журасса мероприятиярду дуллансса ххуйсса идара бикIан аьркинссар республикалий. Дусшиврул къатта хьунтIиссар мукунсса идарану», — увкуна Р. АьбдуллатIиповлул.
ХIадур дурссар П. Рамазановал
