Июль зурул шамунний хьусса хIукуматрал заседаниялий гьуртту хьунни Дагъусттаннал Президентнал къуллугъ чIумуйну биттур буллалисса Рамазан АьбдуллатIипов, республикалул Халкьуннал Мажлисрал председатель Хизри Шихсаидов, ПрезидентначIасса Стратегиялул советрал исполкомрай каялувшиву дуллалисса МахIаммад Мусаев, Президентнал ва ХIукуматрал Администрациялул хъунама Шагьабас Шагьов ва цаймигу къуллугъчитал.

Му заседаниялий ххалбивгьунни дагъусттан агьалинал маэшат, экономика, оьрмулул багьу-бизу хьхьичIунмай баврил масъалар­тту.
Му мурадрайсса Стратегиялул планну бартдигьлагьисса давурттив уттинингу дуллай бивкIхьурчагу, цIана куннасса къулагъас къадиркIун дур. МахIаммад Мусаев каялувшиву дуллалисса, Москавлия бучIан бувсса аьлимтурал группалул личIи-личIисса министерствардай ва ведомствардай зувинниха ливчусса сессиярду бувссар, цукунсса давурттив дуван багьлай бурив хъинну хъирив лавну ххалбигьлагьисса, — увкунни Р. АьбдуллатIиповлул. – Дагъусттаннал региондалул валовый продукт Аьрасатнавунияр дянивну шамийла чансса дур. Мунил исват буллалиссар жулла социал программарду ва цайми программарду Аьрасатнал билаятрайминнучIа цачIу дирхьуну шамийла хьхьара­сса душиву. Теневая экономикалул бутIарив жучIава лахъва-лахъмур бур. Миграциялулмур масъала ласурчагу, так ларгсса шинал республикалия лавгун ур 22 азара инсан. Му хIисавравун ласунсса хIуччари. Дагъусттанлувтуран цанма Дагъусттаннай яхъанан ччай бакъахьурча, цукунсса имиджраяр гъалгъа бикIантIисса? Гьантлун кьуйла жува инвестициярдая гъалгъа тIурчагу, мигу агьалинал ккал-аьдадрах бурувгун жучIава Аьрасатнавунияр мукьийла чанни.
Республикалул бакIчинал кутIану бувсуна республика хьхьичIуннай хъит учин дувансса 10 проектрая. Мунал бувсмунийн бувну, «Обеление экономики» инвестициялул проект бартдигьаврийну ххютулумур экономикалун ххуллу кьукьинтIиссар. «Да­гъусттан мискин хъанахъиссаксса, чиновниктал авадан хъанай бур. Мукун бикIан къааьркинссар», — увкунни Р. АьбдуллатIиповлул.
«Эффективное территориальное развитие» тIисса проектрая буслай, мунал чIурчIаву дунни республикалул шагьрурдай ттучаннаха агьалинан рахIатну яхъанансса, бигьалагансса кIанттувагу бакъашиву.
«Бренд Нового Дагестана» тIисса проектрал мурад бур, «Произведено в Дагестане», «Сделано в Дагестане» тIий, Дагъусттанналмур продукциялул марка гьаз буллансса.
«Гьарцагу муниципалитетир­ттай, детсадирттай, азарханардай, школардай дагъусттанналмур продукция машан ласлан аьркинссар, мукун къабуллалими давурттая букьан буллантIиссар», — увкунни Рамазан АьбдуллатIиповлул.
«Человеческий капитал» проектравун дагьлай дур цаппара проектру: «Просвещенный Дагестан», «Культура и культурная политика Дагестана», «Здоровый Дагестан», «Социальная защита». «Безопасный Дагестан» тIимур проект сияхIраву ацIулчинмур кIанттай духьурчагу, Р. АьбдуллатIиповлул тIийкун, агьамшиврул чулуха хьхьичIва-хьхьичIмур кIан­ттаймур проект хъанай дур, «низамгу, инсаннал ихтиярдугу къадуручларча, цукунчIавсса хьхьичIуннайшивуртту дикIан къабюхъайну тIий».
Заседаниялий, мукунма, ххалбивгьунни газрал, навтлил, энергетикалул масъаларттугу.
ХIадур дурссар П. Рамазановал