Ларгмур нюжмардий Дагъусттаннайсса Аьрасатнал Федерал налогирттал къуллугърал (ФНС) управлениялий хьунни ва идаралул даврищал ва налогру датIайсса къуллугърал мурадирттащал кIул буллалисса республикалул СМИ-рдал журналистурансса семинар-батIаву.

З.АьбдурахIманова
Семинар батIаврил хъунмур сававгу дия Дагъус­ттаннал президентнал кIанай чIумуйну зузисса Рамазан АьбдуллатIиповлул «Обеление экономики» тIисса приоритетсса программа кьамул даву ва «ххютулу» даврихсса хIакь ласаву, республикалий налог датIаврил база гьарта-гьарза баврин хасъсса давурттив тIалав дуллалаву.
БатIаву тIитIлай Управлениялул каялувчи Умахан Жаб­раиловлул кIицI лавгунни, журналистурансса укунсса журалул семинар Дагъусттаннал налогирттал къуллугърай цалчин хъанахъишиву. Мукунма ванал ххи бувунни чIа-чIаннин республикалул СМИ-рдай налогру датIайсса къуллугъирттал даврия щалва тIайлану чивчуну къабикIайшиву.
«Масс-медиалул чIявусса вакилтурал республикалул налогирттал отрасльдания бусласийни хъирив къалавсса, ялттутурасса ххалбигьавуртту кIицI лагай. Учин ччива, укун къалпсса хавардал хьхьичIалу кьукьин, жу вания гихунмай хIадурссару республикалул халкьуннащал ва СМИ-рдащал цачIу зун. УФНС-рал циняв зузалт хIадурссар налог дулултрал ва журналистурал чулухасса суаллан балжийсса жавабру дулун», -увкунни У. Жаб­раиловлул.
Отрасльданул даврия буслай Умахан Жабраиловлул кIицI лавгунни ишбажаранчитурал регистрация дуваврил масъалагу.
«Налогирттал къуллугърай регистрация дуван-му ишбажаранчинал тIайланмасса ва конституциялул буржри. Жу гьарца кьини ялун личин бувару налогирттал къуллугърал сияхIрай цалла цIа-бакI къачирчусса ишбажаранчитал. Ларгсса шинал МахIачкъалалив жу ялун личин барду шаназаллий шанттуршва машлуха зузисса кIанттурду, налог дулай къуллугърал сияхIрайвагу бакъасса», увкунни ванал.
Умахан Жабраиловлул бувсунни, республикалул бюджет налог датIай къуллугърал 78% щаллу бувайшиву.
Дагъусттаннал ВВП-лул структуралия буслай управлениялул каялувчинал кIицI лавгунни, республикалий налогру дишаврил чулуха щаллу­сса отрасль –обрабатывающее производство душиву. Яла налог дишин къабюхълахъимур отрасль дусса дур шяраваллил хозяйствалул отрасль-0,7 %. Ларгсса шинал ва отрасльдания республикалул бюджетравун дуркIун дур 141 миллион арцуйн дирсса налогру.
Ванал мукунма ххи бувунни зунттавусса аьрщарал 90% хасъсса къуллугъирттай кIицI дурну дакъашиву.
Республикалул транспортрал масъалалия буслай, хъунама налоговикнал чIурчIав дурунни ДР-лул ГИБДД-лул хIасиллайн бувну, Дагъусттаннай сайки 500 азаруннийн дирсса транспорт душиву.
«Аьрщарал ва хъуслил сияхIру дулун аьркинссар Да­гъусттаннал циняр муниципалитетирттал кIантту-кIанттурдайсса налогирттал къуллугъирттайн. Амма махъсса шиннардий цурда ца муниципалитетрал ми сияхIру дурарагу дуллуну дакъар», ххи бувунни Умахан Жабраиловлул.
Республикалул банкирдал сфералия буслай, ванал кIицI лавгунни жучIарасса сайки циняр финансирттал идарартту банкру зун аьркинсса, тIалавсса журалий зий бакъашиву, фирма-«однодневкахъайхчIин» арцу наличкалийн кIура даен дуллай низамрал ххуттава личлай бушиву.
«Банкирдал акъар мудана­сса цала мяйжаннугусса муштари. Укунсса банкирдачIату жу тIалав бувну Аьрасатнал Центробанкрал лицензияртту махъуннай тIалав дурссар», увкунни ванал.
Цалва мукъул ахирданий Умахан Жабраиловлул увкунни, журналистурал мурад муданмагу бивкIшиву халкьуннал мурадру, ихтиярду дуруччинсса. Мунияту СМИ буржлувссар миннахь налогру дуллалира тIисса тавакъю бан.
ДР-лийсса УФНС-рал налогоплатильщиктуращал зузисса отделданул хъунама Багьауттин Аьлиевлул цалва ихтилатраву маслихIат бувунни республикалул налогоплатильщиктурахь ччя-ччяни ДР-лийсса Аьрасатнал УФНС-рал сайтрайн бухлан.
«Жул сайт халкьуннал ва СМИ-рдал дянивсса информациялул площадкар. Цалва шаппа-шаппа щябивкIун миннаща бюхъантIиссар цаятура дагьайсса буржирдал арцу лахъан жул порталдануйхчIин», увкунни ванал.
Гихунмай вайннал кIицI лавгунни уттиния гихунмай Управлениялул базалий Да­гъусттаннай цIадурксса, жяматийсса ишккаккултгу гьуртту хъанантIисса пресс-клуб сакин бантIишиву.