Вай гьантрай щалвагу билаятрай хьунни Госавтоинспекциялул
къуллугъран 77 шин шаврил шадлугъру.
Госавтоинспекциялул служба сакин бувну бивкIссар 1936 шинал, ххуллурдайх заназисса машинарттал ялув бацIаву дан. Службалул зузалтрал агьаммур мурад бивкIссар аварияртту хьун къаритаву, шупIиртал хIадур баврил ялув бацIаву. 1967 шинал ГАИ бувхссар МВД-лул структуралувун цилва бияла цихьвасса идара хIисаврай. 1988 шинал АьФ-лул Президентнал ХIукмулийну ГАИ-лия бувссар ГИБДД.
ргунни МахIачкъалаливгу, Чернышевскийл цIанийсса кIичIираву дирхьусса ГИБДД-лул къатраву.
А. Аьбдуллаева
Цалва зузалт пишалул байрандалущал барча буллалисса ва тIайлабацIу чIа тIисса ихтилат бунни ДР-лул УГИБДД-лул хъунама В.А. Громовлул. Ванал дурккунни ДР-лул виваллил иширттал министр Аь. МахIаммадовлул службалул зузалт барча буллалисса телеграмма.
— ГИБДД МВД-лул системалуву ца хъуннасса хъар лархъун нанимур службалун ккаллиссар. Гьарица кьини ххуллурдайсса низамрал къаралданий бавцIуну, зул службалул зузалтрал агьали апатIирттая мюхчан буллай буссар. Зухь хъунмасса бияла буссар республикалий тахсиркаршивуртту хьун къаритан ва хьуми ашкара дан.
ЛяличIинува барча бан ччай ура ва кьини службалул ветерантал, пенсиярттайн бувккун мукьахгу жяматийсса низам дуруччавриву зузиминнан, жагьилминнал кумаг буллалисса, — тIий чивчуну бур министрнал телеграммалуву.
Хъирив В.А. Громовлул дурккунни цаймигу барча буллалисса телеграммарду – нукIувасса ГАИ-лул хъунама, цIана Федерациялул Советрал член В. Федоровлул чулухасса, Волгоградуллал, Ростовуллал, Вологодуллал областирдаясса, Татарсттаннаясса ва цаймигу Аьрасатнал регионнаясса.
ГИБДД-лул зузалт барча буллалисса ихтилатру бунни ва службалул ветерантурал организациялул председатель М. ХIажиевлул, хьхьичIсса шиннардий ГАИ-лул каялувчиталну бивкIсса Н.У. Ахадовлул, Х. Шахрудиновлул, ДПС-лул инспектор А. Керимовлул. ЦIана жяматийсса палаталувусса Н.У. Ахадовлул бувсунни ГИБДД-лул масъалартту гьаз буллантIишиву Жяматийсса палаталуву, яла-яла, хIакьину яла цIурювкьусса МахIачкъалаллал ххуллурдайсса машинарттал пробкардал ва машинартту бацIан бансса кIанттурду бакъашиврул масъала.
Шахрудиновлул увкунни:
— ГИБДД-лул служба яла узданмур служба хъанахъиссар, цанчирча ва службалул мурад агьали балардая, апатIирттая мюхчан баву буну тIий.
Аьрххилийн бувкми цIуллу-сагъну зана шаву зул биялдарал ишри. Му бакъассагу, службалул хъуннасса хъар лахълахъиссар экономика хьхьичIуннай давриву, социал масъалартту щаллу бавриву…
Ихтилатру къуртал хьуну махъ давриву ххуйсса ккаккияртту чIалачIи дурсса зузалтран дуллунни бахшишру.
Яла, цинявппа бувккун, Управлениялул хIаятраву, къуллугърал бурж лахълай жанну дуллуминнан дацIан дурсса гьайкалданучIа дирхьунни тIутIив.
