Июньдалул 19-нний ДР-лул Президентнал кIанайма Рамазан АьбдуллатIипов Санкт-Петербурглив къуллугърал аьрххилий унува хьунаавкьунни Дагъусттаннай инвестициярдал проектру ишакаш дуллан хIадурсса кIанттул бизнесчитуращал.
Хьунабакьаврий гьуртту хьунни ДР-лул ХIукуматрал Председательнал хъиривчу Абусупиян Хархаров, ДР-лул машлул ва кьатIаллил экономикарттащалсса дахIаврил министр Юсуп Умавов, С-Петербургливсса Дагъусттаннал вакил ХIасан ХIасанов ва цаймигу.
Хьунабакьаврий гьуртту хьуминнахь аьла-ссалам буллай, Рамазан АьбдуллатIиповлул бувсунни, цIанасса ппурттуву Дагъусттаннай дузалшиннарду дуллай бушиву, мунияту республикалул патриотътуран аьркинну бушиву цащава шайсса кумаг бан республика хьхьичIуннай хьун давриву.
«Дагъусттан – жулла Ватанни, жулла рухIирал парчар, жува кьатIув цуксса ххуйну яхъанарчангу, Ватандалийн кIункIу тIийнма бикIару.
Жува Дагъусттаннал цIаниягу зун аьркинссару. ХIакьину регион тIивтIуну бур хIала-гьурттуну зуншиврул. ХIакьину яла агьаммур даву – республикалий культуралул тIабиаьт даххана давур. Му хъуннасса давур», — увкунни ДР-лул БакIчинал.
ДР-лул Президентнал кIанайманал бизнесчитурахь бувсунни хIадур дурну къуртал шавайсса президентнал 10 приоритетсса проектрая. Миннувух дур: «Новая индустриализация», «Предприниматель – опора Дагестана», «Диаспора – сила Дагестана» ва цаймигу.
Р. АьбдуллатIиповлул увкусса куццуй, цалла Ватандалул кьатIув ялапар хъанахъисса, ишру бавчусса дагъусттанлувтал аьркинссар гьуртту хъанан инвестициярдал проектирдавух, дучIиягу ласлай.
Хъиривмур кьини Дагъусттаннал БакIчинал ихтилат бантIиссар Петербургуллал дунияллул халкьуннал экономикалул форумрал «ккуркки столданий». «Ккуркки столданул» тема дур «Преодоление турбулентности на кризисных территориях». Р. АьбдуллатIиповлул ният дур му масъала щаллу бансса чаранная бусан.
ДР-лул Президентнал кIанайманал бувсунни Дагъусттаннай зий ушиву ДР-лий ишбажаранчитурал ихтиярду дуруччайма Башир МахIаммадов, ва аьркинну душиву сакин дуван ишбажаранчитал личIи-личIисса коррупциярттал схемарттая буруччайсса система.
«Республикалий буллай бур цаппара цIусса заводру, ишакаш дуллай бур аграрий проектру. Региондалул цичIав ласлай бакъар навтлия, электроэнергиялия, чавахърая, ми гьарзат тIайла дацIан дан аьркинни. ЦIанасса яла агьаммур масъала – кадрардал политика даххана давур. ЗахIматри лякъин жаваблувсса къуллугърай итансса инсан. Жу хIатта оьвчарду Дагъусттаннайн зун Москавлиясса ва Санкт-Петербурглиясса сянаткартурайн», — увкунни Р. АьбдуллатIиповлул.
Дагъусттаннал бакIчинал барчаллагь увкунни бизнесчитурахь хьунабакьаврихлу.
Бизнесчитуралгу барчаллагь увкунни ДР-лул БакIчинахь хьунабакьаврихлу ва бувсунни хIадурну бушиву Дагъусттаннал Президентнал кIанайманал язи бувгьусса ххуллуцIун кабакьин.
ХIадур бувссар ХI. Аьдиловлул
