Дагъусттаннай дуссар, щийнчIав хъар дакъа, ччимур идаралул даву жулва жяматран хайрданун ягу заралданун зий дурив ххал дуван бюхъайсса, «Общественная палата РД» тIисса, харжи бакъанма зузисса инсантурая сакин дурсса сиясийсса орган. Ваниха лархьхьусса дур Ккуллал райондалул «Жяматийсса совет» тIисса сиясийсса органгу. Ва Советрал председательну зий ур Хъусращиял шяравасса, Халкьуннал учитель хIурматрал цIанин лайкь хьусса, АхIмадов ХIасан АхIмадович.

Ирглийсса ва советрал батIаврий вайннал вичIи дирхьуна Центр Социального Обслуживания Населения идаралул пишакар Мудунов Дибирдух. Ванал кIицI дуруна ларгсса шинал мутталий ва гьашинусса шанма зуруй цалва кумаг бувсса инсантурал сияхI ва циксса арцунсса кумаг бувссарив. Мудунов Дибирдул кIицI бувсса цаппара затру нагу зухь бусанна. Ва бугьара хьусса, бюкъахълахъи­сса инсантуран кумагру буваннара тIий хIукуматрал хIасул дурсса идаралий зий усса ия 62 зузала. Миннавату бюкъахъултран кумаг буллалисса 40 зузала ур. Аьркинну усса ия вайннан психолог ва юрист. Цинявппагу ва идаралул аякьалулу бушиврун ккалли хъанай бусса бия 169 инсан. Бувсуна Дибирдул нюжмардий шамила гьан аьркиншиву цалва зузалтран цацIунма бавхIусса бюкъахъултрал шаппайн гайннан кумаг буван. КIицI бувуна ванал дукIусса шинал ххину, дяъвилия зана къавхьусса ягу зана хьуну махъ ахиратравун лавгсса ветерантурал кулпатирттан вайннал ласайсса арцу «Яхьун бюхъайсса арцуйн» къадиллай думиннан 500 къуруш ца-ца кулпатран дуллушиву. Мукунсса кулпатру хьуну бия 31. КIицI бувуна ванал мукунма Кулпатрал кьинилий, Бугьараминнал кьинилий кумаг бувшиву 56 кулпатран. Декабрьданул шамунний кIицI лагайсса Мушакъатнал кьинилийн дулун аьркинну бивкIсса арцу, документру хIадур бувну бунува, Министерствалия къадучIаврийн бувну, дулун къархьунни тIива. Мий арцул сияхIгу диркIун дур 14500 къуруш.
Хъирив Мудунов Дибирдул советрал хIаласултрал буллалисса суаллангу жаваб дуллуна. Вайннал, хIатта ва идаралул зузалт буржлувну бакъанугу, тавакъю бувуна аякьалулусса инсантал чани чансса, къюкIсса, кказит буккин къашай­сса, телевизорданувух, радиолувух тIутIимур къабаяйсса инсантал бухьувкун, чан-кьанссавагу вайннахь дунияллий хъанахъисса ишир­ттаяту бусаву. Гьаз хьуна шикку ца укунсса, цила советрал давривун багьлагьисса, ишгу. Хъювхъиял шяравасса АхIмадов Аьбид ия, хIатта шяравусса инсантурал цува Жяматийсса советравун увчIусса вакил ухьурчагу, ца-ца «къучи», «Ина цура?» тIий, вичIи къадихьлай икIайшивугу. Ванийн бувну ванал: «Мукун тIинал хьхьичIун дугьан, нава цу уссарав чивчусса удостоверения бикIан багьлай бур», — куна. Ва масъала биттур буван бакIрайн лавсуна ХIасан АхIмадовичлул. Советрал ихтилат бувуна, мукунма, Ккуллал райондалий яхъанахъисса инсантурал оьрму ххуй чулинмай кIункIу буваншиврул ци хIуччарду аьркинну буссаривгу.