Майрал 13-нний МахIачкъалаллал Родопуллал багъраву бигьалаглагиминнангу, гивах гъанну бивкIминнангу ккавккунни самолетравату тIанкI дурну, лелуххант кунма, кIия ялавай бивгьуну най бивкIсса парашютчитал, яла гай ливккуна шагьрулул пляжрай.
ХIасан Аьдилов
Га спортрал мероприятие хас дурну дия хьхьичIунсса летчик, СССР-данул ва Аьрасатнал лайкь хьусса спортрал усттар ва тренер, ДР-лул ва АьФ-лул физкультуралул лайкь хьусса зузала Кьасум Нажмуттиновлун 80 шин шаврин.
Гара кьини Къумукьнал театрдануву хьунни ватандалул авиаспортрал сагънува бусалардавун агьманан хасъсса шадлугърал батIаву.
Шадлугърай ихтилат буллай, ДР-лул ХIукуматрал Председательнал 1-ма хъиривчу Анатолий Карибовлул бувсунни Кь. Нажмуттиновлул оьрмулия. Ганал бувсмунийн бувну, Кьасум Нажмуттинов увну ур Ххунзахъиял райондалий Гонохиял шяраву. Ганал къуртал бувну бур авиациялул аьралуннал летчиктурал училище 1957 шинал. Яла къуллугъ буллай ивкIссар Москавуллал аьралуннал округрай.
Дагъусттаннайн зана хьуну махъ зий ивкIссар МахIачкъалаллал авиациялул клубраву летчик-инструкторну, яла – Дагъусттаннал командалул тренерну. Га цимилагу ххув хьуну ур СССР-данул чемпионатирттай. Яла Кь. Нажмуттинов зий ивкIссар РСФСР-данул хъунама тренерну 1991 шинайннин.
СССР-данул ва РСФСР-данул цачIундур команда гьуртту хьуссар Европанал ва дунияллул 18 чемпионатрай. Кьасум ХIусайнович хъунама тренерсса билаятрал арамтуннал командалул 6-ла цалчинми кIанттурду бувгьуну бур, кIийла – кIилчинми кIанттурду ва цал – шамилчинмур кIану.
Ганан кIилла дуллуну дур ЗахIматрал ЯтIул Ттугълил орден, орден «Знак Почета», Дунияллул халкьуннал федерациялул мусил медаль ва цаймигу наградартту.
Яла Анатолий Карибовлул бувккунни ДР-лул Президентнал кIанайма Р. АьбдуллатIиповлул хIукму, Кьасум Нажмуттиновлун дуллунни «За заслуги перед Республикой Дагестан» тIисса орден.
Ссавнил багьадура барча уллалисса махъру лавхъунни, мукунма, ганал дустурал ва учениктурал. Миннал бувсунни Кь. Нажмуттиновлул цува Аьрасатнал цачIундур командалул хъунама тренерну зий ивкIсса шиннардий хIадур бувну бушиву авиаспортрал 12 дунияллул абсолютный чемпион ва 18 Европанал чемпион.
