Майрал 13-нний Дагъусттан Республикалийсса Роспотребнадзорданул Управлениялул каялувчи Элеонора Оьмариева «День открытых дверей Роспотребнадзора» мероприятиялул хахливу хьунабавкьунни МахIачкъалаллал школардал 10-11 классирттал дуклаки оьрчIащал.

Залму АьбдурахIманова
ТIиртIу нузкьунттал кьини кIицI лагаврил мурад бур дуклаки оьрчIру ва къуллугърал даврищал кIул баву, шиккусса Роспотребнадзордануву ишласса пишакаршивурттая ва «Центр гигиены и эпидемиологии в РД» ФБУЗ-рал лабораториялия бусаву.
ДР-лийсса Роспотребнадзорданул Управлениялувусса социально-гигиеналул отделданул хъунмур Зулайхат Бархуевал ва «Центр гигиены и эпидемиологии в РД» ФБУЗ-рал лабораториялул контрольданул отделданул хъунама Ибрагьим Буттаевлул оьрчIахь бувсунни Дагъусттаннай хIукуматрал санитарно-эпидемиологиялул къуллугърал тарихрая, ва къуллугъ зузи баврил мурадирттая, ванил дурсса хьхьичIуннайшивурттая ва кка­ккиярттая.
Мукунма вайннал дуклаки оьрчIахь бувсунни хаснува цIана Роспотребнадзор ци масъалалул хIакъираву зий буссарив ва дуклаки оьрчIащагу бюхъайшиву муштаринал ихтиярду дуруччавриву гьуртту хьун. Хаснува вайннал оьрчIахь бувсунни хIакьинусса нигьачIишиву хъуннасса заманнай вай чантI куну бикIан аьркиншиву, щак-щук бутайсса иширттаву личIлулну бикIан аьркиншиву, цалла марцI-чапалшиврул ялув бацIаву дуван аьркиншиву, цила чIумал прививкарду дуван аьркиншиву, ттучаннаву ва базаллаву ласайсса дуки-хIачIия лахъи ларгсса дурив дакъарив ххал дурну, ялув бацIаву чан дан къабучIишиву.
Хъирив дуклаки оьрчIан кка­ккан бувунни «Центр гигиены и эпидемиологии в РД» ФБУЗ-рал лаборатория.
Роспотребнадзорданул ва структуралул управлениялул давриву хъунмасса кIану бугьлагьиссар.
Дуклаки оьрчIахь лабораториялуву бувсунни цалла цIуллу-сагъшиврун зарал къабиянну компьютер ва телефон цукун ишла дурну хъинссарив, цукун ххал дантIиссарив хIачIай щинал, дукиялул марцI-чапалшиврул тагьар ва цукун ххал дайссарив лахъай азарду ци сававну ччяни ппив шайссарив.
ОьрчIругу хъунмасса гъирарай цIухлай бия санитар хIакинтурал ва лабораториярттал пишакартурал давурттая. Миннава чIявуминнал бувсунни цивппа гъирарай укунсса пишакарталну зун ччан бивкIшиврия.
Гьантлия гьантлийн дуклаки оьрчIаву гьаз хъанай бур муштаритурал ихтиярду дуруччай темардах­сса гъира. Укунсса хьунабакьавур­ттаясса мюнпат-хайр хъунмассар, цанчирча инсан хIадурну икIан аьркинссар заманалуцIун дархIуну ялун нанисса захIматшивурттайн ва дахханашивурттайн.