Набинал арс ЦIаххаев Аьбдулкьадир-Гилани

Аьрасатнал ЗахIматрал министерствалул «Махачкалинское протезно-ортопедическое предприятие» ФГУП-рал коллектив дакIнийхтуну жижарагу буллай, баян буллай бур 2003 шинал майрал 16-нний 53 шинал оьрмулуву нязаннийсса бивкIулул жуятува личIи увшиву Дагъусттан Республикалул лайкь хьусса хIакин, медициналул элмурдал кандидат, медициналул отделданул заведующий, директорнал хъиривчу ЦIаххаев Аьбдулкьадир-Гилани Набинал арс.
Увну ур Аьбдулкьадир-Гилани ЦIаххаев майрал 26-нний 1960 шинал Лакрал райондалийсса Хьур­ттал шяраву машгьурсса хирург-травматолог, профессор, медициналул элмурдал доктор ЦIаххаев Наби ЦIаххуйл арснал кулпатраву.
1977 шиная 1983 шинайннин дуклай, Аьбдулкьадир-Гиланил лахъсса кьиматирттай къуртал бувну бур Дагъусттаннал медициналул институт. 1983-1985 шиннардий миккува къуртал бувну бур травматологиялул ва ортопедиялул кафед­ралий клиникалул ординатура.
1985-1988 шиннардий дуклай ивкIун ур Ленинградуллал НИИ-рал протезированиялул аспирантуралуву.
1990 шинал Р.Р. Врединнул цIанийсса Ленинградуллал НИИ-рал травматологиялул ва ортопедиялул Советрал ванан буллуну бур медициналул элмурдал кандидатнал ученый степень.
1988-2010 шиннардий Аьбдулкьадир-Гилани предприятиялул медициналул отделениялул заведующийну зий уссия.
2010 шиная хIакьинунин предприятиялул директорнал хъиривчунал къуллугърай зий уссия.
Аьбдулкьадир-Гилани Набиевич Аьрасатнал протезистурал-ортопедтурал гильдиялул чялишсса гьурттушинна дувайсса вакилъя.
Медициналул элмурдал кандидат хIисаврай ЦIаххаев Аьбдулкьадир-Гилани чIярусса давурттал, методикалул насихIатирттал ва авторнал изобретениярттал ва рационализаторсса маслихIатирттал авторъя. Ванал мукунна чялишсса гьурттушинна дувайссия Дагъусттан Республикалул жяматийсса ишир­ттавугу. Предприятие цIубуккан бавриву ва жулла хIукуматрай мушакъатсса халкь реабилитировать буллай 25 шинал дянив ванал хъунмасса захIмат бивхьуссар.
Аьбдулкьадир-Гилани ЦIа­ххаев жун дакIний личIантIиссар хъинну гьунар бусса, дакI хъинсса, личIлулсса, пахру-ххара бакъасса инсанну. Ванал, чIявусса халкь цIуллу-цIакьсса оьрмулийн вихшала, умуд бишин бувну, цаятура хъинсса цIа кьадиртссар.
Жу, ванащал архIал зий бивкIсса циняв, дакIнийхтунусса кьурчIишиву кIидачIлай буру Аьбдулкьадир-Гилани ЦIа­ххаевлул нязаннийсса бивкIулул ванал кулпатращал ва гъан-маччанащал.

********************************

Аьбдулкьадир-Гиланил арс ЦIаххаев ЦIаххуй
Хъуннасса кьурчIишиву дирунни цила чIумал цикссагу инсантурал оьрмурду ххассал бувсса, цIаларгсса хIакин, медициналул элмурдал доктор Наби ЦIаххаевлул наслулул ужагърайн: мунал арс Аьбдулкьадир-Гиланигу, арснал арс ЦIаххуйгу баласса авария хьуну аьпалу­хьхьун лавгунни. Ца кьини ххаллилсса ппугу, арсгу ахиратравун тIайла буккан багьунни миннал тухум ххирасса дагъусттаннал жяматран.
ЦIаххуй увну ур июль зурул 5-нний 1984 шинал Ма­хIачкъалалив. 2001 шинал къуртал бувну бур МахIачкъалаллал №13 школа, мура шинал Да­гъусттаннал университетрал экономикалул факультетрайн дуклан увххун, 2006 шинал къуртал бувну бур. 2007 шиная шинай зий ивкIун ур ОАО «Россельхозбанкрай».
ЦIаххуй ия давриву итххявхсса, аькьлу бусса, хьхьичIун урувг­сса, адаврай оьрму бутлатисса ххаллилсса жагьил. Машгьурсса ттаттал ва буттал цIа бусравну ядуллалима.
Ва духIан захIматсса кьур­чIишиву кIидачIлай, жижара буллай буру Аьбдулкьадир-Гиланилгу, ЦIаххуйлгу ичIу­вацириннахь, мачча-гъанцириннахь.
Ми алжаннул ххари буваннав, гьаттардий нур дизаннав.
Хьурттал жямат
********************************

Къапланнул душ Амирова Багинат
Оьрмулул 78 шинаву, хар-хавар бакъа ялун дирсса захIматсса азаруннил жуятува личIи бунни хIакьсса зун­ттал хъамитайпа, нину-виричу, захIматрал ветеран Ккуллал шяравасса Къапланнул ва Къизал душ Аминова Багинат.
Багинат бувссар 1935 шинал Ккуллал шяраву. ЧIивинияцIа канил захIматрал кьадру-кьимат кIулну, зунттал хъамитайпалул язи-язими хасиятирттай тарбия хьуссар Багинат. Буттал шяраву 7 класс къуртал бувну махъ ванил захIматрал ххуллу байбивхьуссар ва колхозраву.
Оьрмулул дусну нясив хьуна, цуппа куна, захIматраву савсъсса, оьрчIнияцIавасса ризкьичи Амиров Рамазан.
Рамазаннул ва Багинатлул кулпатраву хъуни бувну, оьрмулувун буккан бувссар ацIа арс ва ца душ. Багинат мудангу цила ласнал гьарца иширавусса урчIа кану буссия. ХIатта ласнащал архIал, ттархьгу кIунттил дугьлай, мунал хIухчалтрангу дукра дуллай ва махъсса аьркинмур дузал дуллай, цимилвагу лавгссия 600 километралул архсса къутаннайн.
ДакI тIиртIунмасса, циятура тIалавшинна дусса, чIахху-чIарахминнащал бавкьусса, инсаншиврул ххуйми хасиятру дусса, дирисса Багинат лагма-ялттунал дянив ва щалла шяравугу бусравну бивкIссар цинявннан.
Цибанссар, лавгунни Багинат ахиратравун, цина ххирасса лас, оьрчIру, оьрчIал оьрчIру, гъан-маччамигу махъ кьабивтун.
Багинат ахиратрал шаврил кьурчIишиву кIидачIлай, дакIнийхтуну жижара буллай буру мунил лас Рамазаннухь, душ Дайгьинатлухь, арсурваврахь, миннал оьрчIахь, махъсса гъан-маччанахь. Багинатлунгу алжан нясив баннав, рухI хъинний дишиннав.
Ккуллал жямат

Багинат, ххира бавахь
Багинат, ххира бавай,
Багинат – оьрчIал бавай,
ОьрчIру ятинтал бувну
Цан лавгра, чIун дакъанна?

Жяматран бусрав хьусса
АцIа арснал ххуй бавай,
Буттан ляълу-жавгьарсса
Ххира бавай, ххуй бавай.

АцIа уссил ссу буна,
На нигьа буслай бура,
ДакIнийсса бургъил чани, —
Бавай, ина дакъа тIий.

Бава ххира, жул буттай –
Щарнил пахрулул къалай.
Утти цукун бухIланна
Бава дакъасса гьантри?
Душ Дайгьинат