Майрал 15-нний Дагъус­ттаннал педуниверситет­раву кIицI ларгунни дагъусттаннал филологиялул факультет тIивтIуну 10 шин хъанахъисса шадлугъ.

Залму АьбдурахIманова
Шикку гьурттушинна дан бувкIсса хIурмат бусса хъамаллуравух бия ХI. ЦIадассал цIанийсса Мазрал, литературалул ва искусствалул институтрал директор МахIаммад МахIаммадов, ДР-лул Чичултрал союзрал председатель МахIаммад АхIмадов, чичулт Тубхат Зургалова ва Аминат Аьбдулманапова, ДГПУ-лул декантал, проректортал.
Факультетрал юбилей кIицI лаглагисса шадлугъ тIитIлай, ФДФ-рал декан, филологиялул элмурдал доктор Ибрагьим Дибировлул, циняв шиккун бавтIсса хъамал барчагу бувну ва агьамсса иширащал, бувсунни факультетрал чIиви-хъунсса тарих.
Деканнал бусаврийну, дагъус­ттаннал филологиялул факультет тIивтIуну бур 2003 шинал филологиялул факультетрай диркIсса оьрус мазрал ва дагъусттаннал отделениялул гьанулий. ХIакьинусса кьининин ва факультетрая бувккун бур 600-нниха ливчусса студентътал-пишакартал. Факультетрал гьур­ттушинна дувайсса дур АьФ-лул КIулшивуртту дулаврил министерствалущал цIу-цIусса программарду хIадур дувавриву, зий бусса бур цIузаманнул планнайн чул бивщуну – бакалавртал, магистртал ва цаймигу пишакартал хIадур буллай. Факультетрай бусса бур кIива кафедра – Дагъусттаннал мазурдил кафедра ва Дагъусттаннал литературалул кафедра. Шикку зий усса усса ур 42 преподаватель, миннавух бур элмурдал доктортал, профе­ссортал, кандидатътал, доцентътал. Мукунма факультетрай бусса бур аспирантура ва докторантура.
И. Дибировлул ахирданий факультет барча буллалисса адресру дурккунни ДР-лул Президентнал администрациялул ва хIукуматрал, Сулайман-Стальскаллал райондалул бакIчи Н. АьбдулмутIалибовлул, ДР-лул Халкьуннал Мажлисрал депутатътурал, ДР-лул Миллатирттал политикалул министерствалул, Москавуллал РАН-лул Языкознаниялул институтрал, Пятигорскаллал лингвистикалул университетрал, Къарачай-Чаргаснал хIукуматрал университетрал цIания дуркIсса.
Факультетрал каялувшинна ва студентътал барча буллалисса махъру лавхъунни ДР-лул Чичултрал союзрал председатель МахIаммад АхIмадовлул, ДГПУ-лул цалчинма проректор ХIамзат Жамалуттиновлул, Мазрал, литературалул ва искусствалул институтрал директор МахIаммад МахIаммадовлул ва цайминнал.
Ихтилатирттая махъ гихуннай шадлугъ дачин дансса ихтияр дуллунни студентътурахьхьун. Вайннал хIадур дурсса программарив дия ляличIину авадансса, дагъусттаннал миллатирттал ххазинартту – фольклорданува, аьдатирттава, тарихрава яла язими байранну, балайрду, лаххи-ликкия, дукра-къяс, багьу-бизу, зунттал халкьуннал хасиятру жям дурну, хъамал ва, цивппа кунмасса, вайми факультетирттай дуклакисса шагьрулул школарду къуртал бувсса студентътал махIаттал-хIайран бувансса.
Университетрал клубрал сахIналий гьарца миллатирттал майданну тIивтIуну, ккаккан дурунни миллатирттал аьдатирттавасса ца-ца аьдат. Яруссаннал отделениялул студентътурал ккаккан дурунни хъатIул аьдат, даргиял – «Жалин бацайсса аьдат», лазгиял – хъамаличу кьамул айсса аьдат, лакрал – «Интдайдихьу», табасараннал – дуссух щябивкIсса аьдат.
Хъинну дакIний личIанну сакин дурну дия шадлугъ дачин даву. Масалдаран, концертрал программа дачин дурсса ведущийтал бия миллатирттал вирттаврал янна-уссаву – Хочбар, Шарвили, ПартIу ПатIима, Айгъази, Аьли, Рустам хьуну. Укун тяхъасса программалул хъирив хъамаллурайн оьвкунни авадансса, дагъусттаннал миллатирттал дукрардал гъагъавайсса ссупралухун. Шикку, шашликIирттая байбивхьуну, бия буркив, чуттурду, ба­къухъ ва цаймигу нацIу-кьацIурду. ЧIалай бия студентътурал цалва факультетрал кьини хъун дан, лахъ дан хъунмасса захIмат бивхьуну бушиву. Ванийну тасттикь хъанай бия факультетрай дуклай бушиву хъинну цалва миллатирттал мазругу, буттахъал аьдатругу, тарихгу, магьирлугъгу ххирасса жагьилтал.
Ва факультет бур циняв миллатирттал оьрчIру-душру цачIун бувсса, ца кулпат кунма яхъана­хъисса, дуклакисса кIану. Вай бур гьунттий жулва школардайн ниттил мазрал дарсру дишин бучIантIисса пишакартал.