Ссайну дакIний лирчIри вин ларгсса нюжмар? Ва суал булару жу сайки гьарцагу номерданий.
Реоната Саидова, Лакрал радиолул редакциялул корреспондент:
— Интнил каникуллугу духьувкун, на ттулва душнищал лавгссияв «Президент-комплексравун», Санкт-Петербурглия бувкIсса артистурал мюрщи оьрчIансса спектакль ккаккан. Душгу, навагу рязийну ливчIру.
Халкьуннал хозяйствалул институтраву бия жагьилтурал стратегиялул сессия, микку Дагъусттаннал президентнал къуллугъ чIумуйну биттур буллалисса Р. АьбдуллатIиповгу гьуртту хьуна. Мунал цIа дурна Жагьилтурал политикалул иширтталсса буллалисса комитетрал хъунаманал хъиривчуну зузисса Муслимат Халимбековал давриягу, халкьуннал балайчи Лариса ХIажиевал гьунарданиягу. Ттун республикалул хъунаманал лакку душвавран лахъсса кьимат бишлашисса ихтилат ххишала бакъа тIааьнну бия.
Ялагу дакIний ливчIунни «ТтурчIайнна» телеканалданийсса, фонограммарду ишла дуллалаврин хас бувсса «ккуркки стол». Микку гьурттушинна дунни машгьурсса, махъ сийлийсса инсантурал, Хан Башировлул, Мазагьиб Шариповлул, Качар ХIусайнаевал, Лариса ХIажиевал. ЦIанихсса композитор, машгьурсса музыкант, миллатрал кказитрал редактор, халкьуннал балайчи гьуртту хьусса му ихтилат агьамсса ихтилат бия, хайр-мюнпатрансса масъалартту гьаз буллай, ххалбигьлай бия, лакрал культуралул бучIантIимуний дакIцIуцIаву дусса ихтилат бия.
КьурбанмахIаммад Мурачуев, хIакин-стоматолог:
— Аьрасатнал Президент В. Путиннул баян бунни ЗахIматрал Виричунал цIа дулаву цIудуккан дуван най бушиву. Му гьакссагу ххуйсса пикрир. ЦIанакул бувагу бакъар захIматчинал кьадру. Сийлий ур, ялагума, захIмат къабайма. Мукун бикIан къааьркинссар. ЗахIматчинал сий дикIан аьркинссар, зузалал сий зана ритаву мурадрайсса даву хьунтIиссар ЗахIматрал Виричунал цIа цIудуккан дувавугу.
На школалий дуклакисса чIумал, жун Социалист захIматрал вирттаврал цIарду кIулссия, миннавух хIухчалт, дояркахъул бикIайва. ЗахIмат нахIу лачIаврил ялув хъинну бавцIуну бикIайва нитти-буттахъул бикIу, учительтал бикIу.
На ЗахIматрал Виричунал цIарду ласунми Дагъусттаннайгу чIяву хьуннав тIий ура. Бурганну утти цалчин му цIа щин дулайрив.
Щалвагу Аьрасатнал агьалинал зума-ккарччулун агьсса, «лухIи цIиникь» цIа дусса дунияллул чемпион Расул Мирзаев Алма-Аталий Къазахъисттаннал спортсменнащал ччалли увккун ххув хьунни. Жунма кIулли Расул Мирзаев, оьрус жагьилнайх ивчIанну рирщуну тIий, суд-диваннайх уклаки увну ивкIшиву. Му ппурттуву му ккавкказ жагьил ушиву хьхьичIун ласлай бия, СМИ-рдай ихтилат ккавкказ жагьилтал кIири бичайсса бушиврия бия. Утти, дунияллул чемпионнал цIа цIуницIа цIакь дувайхту, Расул Мирзаев Аьрасатнал гражданин тIий бур. Ци бухьурчагу, ххарира мунал спортрал карьера ххит къадуваврия, ххарира му ххув шаврия.
ЦIуххаву дурссар
П. Рамазановал
