Февральданул 18-нний ДР-лул Президентнал кIанайма Рамазан АьбдуллатIипов хьунаавкьунни республикалул исполнительный властьрал органнал каялувчитуращал. Хьунабакьаврий гьуртту хьунни ДР-лул Халкьуннал Мажлисрал Председатель Хизри Шихсаидов, ДР-лул ХIукуматрал Председатель Мухтар Мажидов ва цаймигу.

БатIаврий ихтилат буллай, рес­публикалул бакIчинал увкунни: «ХIакьину жура дузал дарду Да­гъусттаннал цIусса хIукумат. ЦIанасса ппурттуву гьармур республикалул ХIукуматрал биялалий дур, ганил мюнпатсса давурттайн хъарну дур. Агьали ялугьлай бур ХIукуматрал мюнпатсса давурттах. ЧIявусса тIайласса махъру жува учарду, утти зун аьркинни. ХIукумат сакин дарду давурттал опыт бусса, дуллалимуниву тIайласса, марцIсса профессионалтурая. Ми давурттайн буцинну ца кIапIикI къадуллуссар. Мукунсса диркIссар тIалавшин. Мунияту зу, цIуну къуллугъирттай бивтминнал зулва бурж лахъан аьркинссар Дагъусттаннал агьалинал хьхьичI. Жува зун аьркинссару Дагъусттаннан хъиншивурттал цIаний. Ттун ххишала «откатру» лулттурасса тIисса махъру баян къааьркинссар. Зузияра марцIну, лажин кIялану, узданну. Мукун зун къаччима «щяикIантIиссар». ЖучIава цамур ххуллу бакъассар.
На ХIукуматрал Председательнахь тавакъю буллай ура, цумур министерствалий циксса хъиривчутал буссарив, цIарду ккаккан дурсса сияхI ттухьхьун дулун.
10 гьантлул дянив гьарца министерство, ведомство ссаха зун аьркинссарив аьям бан аьркин­ссар, цаннил даву гамунил тикрал къадулланшиврул. Гьарцаннал цалва кIанттухлу жаваб дулурн аьркинссар.
Яла аьркинссар ялун нани­сса чIумуву биттур дансса 5-7 яла агьамсса давурттал (приоритетир­ттал) сияхI ттучIан диян дан. Ванияр хьхьичI дуркIсса материаллащал на кIул хьура. Цаппара министртураща дакъасса щищачIав къабювхъунни приоритетсса давурттая бусан. Миннал тIайла дурккун дия укуннасса давурттал план. Ттун аьркинну дур мурад бусса давурттал проектру – ми хъанахъиссар яла гъанми 3 шинайнсса зул давурттал хъунмур мяъна-мурад. Тикку бикIан къааьркинссар «увеличить», «расширить», «углубить» тIисса махъру.
Москавлив хIадур дуллай бур хьхьичIунми экспертъталгу хIала-гьурттусса программа. Гай бучIантIиссар Дагъусттаннайн гьарца министерствалул каялувчинащал архIал га программалул цаппара кIанттурду ххалбигьин. ХIакьину ганиха зий буссар. Зу аьркинссар ттун ккаккан дан циняв материаллу февральданул 20-нин. Мартрал 15-нин жучIара дикIан аьркинссар давурттал план 100 кьинилунсса, 1 шинайнсса ва 3 шинайнсса».
Яла республикалул бакIчинал бувсунни цува Москавлив Сбербанкирал хъунама Герман Грефлущал хьунаакьаврил хIасиллая.
Рамазан АьбдуллатIиповлул бувсунни мукунма гьарца министерствалий конкурсрал комиссия зий бикIан аьркиншиву.
Хьунабакьаврий махъ лавхъунни мукунма ДР-лул Халкьуннал Мажлисрал председатель Хизри Шихсаидовлул. Ганал мукъурттийн бувну, министерстварттай ва ведомстварттай ляличIисса низам дирхьуну дур, укунасса инсаннаща бюхълай бакъар министрначIан цирича, ганал хъиривчуначIанмагу уххан. ЧIявусса къаралчитал бивтун бур министртуралгу, миннал хъиривчутуралгу. Щиятур ми нигьа бусласисса. Ганал бувсунни мукунма аппаратирттай яни министерстварттай ва ведомствар­ттай хъуниминнал мачча-гъансса бивтун бушиву, ми бикIан къааьркиншиву.
Муния махъ министртурал кабинетрал даву лахъи ларгунни ДР-лул ХIукуматрал председательнал каялувшиврулу.