Февральданул 15-нний ДР-лул Президентнал кIанайма Рамазан АьбдуллатIипов Москавлив хьунаавкьунни Аьрасатнал Счетная палаталул председатель Сергей Степашиннущал.

Тикку мукунма гьуртту хьунни ДР-лул Счетная палаталул председатель Малик Баглиев, АьФ-лул Счетная палаталул аудитортал.
Хьунабакьаврий чирчунни АьФ-лул Счетная палата ва ДР-лул Счетная палата хIала-гьурттуну зузаврил хIакъиравусса кьутIи. КьутIилий ккаккан бувну бур стратегиялул ва региондалийсса планну даврил цачIусса система сакин даврил, ДР-лул маэшат ххуй баврил анализ ва мониторинг даврил, цIушиннардал проектру ишакаш дуллалаврил бутIуву бюджетрал арцурду мюнпатну харж даврил ва цаймигу масъалартту цачIу щаллу буллан. Га документрай къулбасру дан хьхьичI ДР-лул Президентнал кIанайманал АьФ-лул Счетная палаталул председательнащалсса ихтилат хьунни.
Хьунабакьаврий цалчин ихтилат бунни Сергей Степашиннул. «Ттул пикрилий, ДР-лул Президентнан кIанайманал кьутIи чичин тавакъю баврил бусласиссар Рамазан ХIажимурадович республикалийн укуна ххаралун увкIун акъашиву. Республикалийсса тагьар вин кIулли ххуйну. Жу гьарца шинах ххал дайссар республикалийсса Счетная палаталул давуртту. Ттул пикрилий, жул кьутIилул контрольданул ва ревизиялул давуртту ххуй даврияр ххишала, финансиртталгу, экономикалулгу, бюджетралгу бутIраву хъанахъимур аьлтту буллантIиссар. ДР-лул Счетная палаталул даву чялиш дуккан дан аьркинссар», — увкунни Сергей Степашиннул.
Яла махъ лавхъунни Рамазан АьбдуллатIиповлул. Ганал умуд бивхьунни ванияр тихунмайгу Да­гъусттан Республика мюнпатну, хIала-гьурттуну зуншиврий АьФ-лул Счетная палаталущал. «На ххарину ура Аьрасатнал Счетная палаталул Дагъусттаннал тагьарданух къулагъас даврия. Контрольданул даву дикIан аьркинни, му кIулсса зад бур. Ттун ччай бур АьФ-лул Счетная палаталул республикалул финансирттал ва экономикалул тагьарданул куртIсса анализ дурну. Мукунна цила опытрайну Дагъусттан хьхьичIунмай шаврил ххуллу-хха ккаккан бан кумаг бувну. ЖучIа дакъар 2015 шинайннинсса давурттал план, бакъар му план хъадур дансса бюхъугу. Цанчирча республикалий цаппара ишру хъанай бур цайнува цивппа ва жун къа мюнпатну. Республикалий хъин чулийсса дахханашивуртту дуллан аьркинни. Умуд бур АьФ-лул Счетная палаталул жун кумаг баншиврийн», — увкунни Рамазан АьбдуллатIиповлул.
Яла ДР-лул Президентнал ва АьФ-лул Счетная палаталул председательнал кьутIи цIакь дунни къулбасирттайну.