8-мур мартрал Хъаннил байрандалул хьунийн Оьруснал театрданул Хъунмур залдануву хьунни республикалул личIи-личIисса сферардаву зузисса хъаннинсса хъуннасса шадлугърал концерт.

Концертрал тамашачитуравух бия хIукуматрал хъунисса къуллугъирттай зузисса хъанния тIайла хьуну, ихтиярду дуруччай органнаву, кIулшивуртту дулаврил, цIуллу-сагъшиву дуруччаврил ва цаймигу социал сферардаву зузисса душру-хъами.
Ялун нанисса байрандалущал барчагу буллай, ца-цаннин ца-ца хъункIултIутIи пишкаш дуллай залданувун нанисса хъами хьунабакьлай, тIайла буклай миллатирттал яннардавусса жагьилталгу бия байрандалул тагьар чIюлу дуллай.
Концертрал сакиншинначитурал хIадур дурну дия цинявн­нан хъинну дакI дакьинсса, хъинну бюхттулсса даражалий сакин дурсса концерт.
Шадлугъ дайдихьлай, респуб­ликалул личIи-личIисса сферардаву хьхьичIунсса ккаккияртту дурсса хъами-душру ДР-лул Президентнал врио Рамазан АьбдуллатIиповлул цIания барча бан сахIналийн увксса ДР-лул ХIукуматрал председательнал хъиривчу Анатолий Карибовлул кIицI лавгунни, хIакьинусса заманнай оьрмулул гьарцагу бутIуву хъаннил буллалисса захIматрал кьимат лахъшиву, хъаннилмур биялдаралугу душиву хIукуматрал гьунттийсса кьини, цанчирча ялун нанисса ник тарбия давриву ниттихъал бугьлагьимур кIану хъунмасса буну тIий.
«Ялун нанисса Хъаннил байрандалущал зу циняв барча буллай, чIа учин ччива зун ужагъирттай паракьатшиву, ххуймур-хъинмунийнсса умуд лекъащаву, зунгу, зул мачча-гъаннангу цIуллу-цIакьшиву, тIайлабацIу ва зун-занансса тавпикь», — увкунни ванал.
Гьарцагу номер лахъсса хъатурдихун кьамул буллалисса тамашачитуран хIадур дурсса гьашинумур концертрал программа дия яргсса, тяхъасса, бюхттулсса даражалий хIадур дурсса.
Концерт дачин дурну ия ДР-лул лайкь хьусса артист Алексей Тимохин. ЧIяву махъругу къаишла бувну, интния ва интнил лишан хьусса Хъаннил байрандалия буслай, сахIналул кIивагу чулух видеопроектравух ккаккан дуллай бия Дагъус­ттаннал тIабиаьтрал караматру, щюллишиврувун ва тIутIавун бахьлавгсса кIяла бакIру ду зунттурду, жюр-жюр тIисса марцI щинал бявкъу щаращив ва жюружантту, тIутIайх бивчусса мурхьру, багъру.
Шадлугърал музыкалулмур бутIа щаллу буллай бия, ДР-лул лайкь хьусса артист, хъунама дирижер МахIаммад Абакаровлул каялувшиннаралусса, ДР-лул ХIукуматрал симфонический оркестр. Мукунма концертравух гьурттуну бия хIукуматрал даражалийсса циняр шадлугъру чIюлу дайсса машгьурсса «Лезгинка» ансамбль, вокально-хореографиялул ансамбль «Дагестан», Даггосфилармониялул камерный оркестр, Даггосфилармониялул джазрал оркестр, Дагъусттаннал опералул ва балетрал театр, Аьрасатнал лайкь хьусса артист Уммуразият Арбуханова, ДР-лул лайкь хьусса артистал Шамил ХIажиев, Халисат Батырбекова, Рустам АхIмадханов, Аьбдул Мурадов, Марина Аьли­ева, Султан Айгъази, Миная Пинжалиева ва цаймигу. Хъиннува ххуйну кьамул бувунни залдануву щябивкIминнал, МахIачкъалаллал цаппара школардал ва детсадирттал оьрчIру гьурттусса, «Арабеска» ансамбльданул къавтIавуртту ва ниттихъахасса балайрдугу.
Сайки кIира ссятрай лахъи ларгсса концерт ларгунни кла­ссикалул макьанная, джазрал макьаннайн букIлай, дунияллий машгьурсса классикалул ва джазрал асардаву бунува, хъиривва сайрданий буттахъал щархъавун, кIичIирттавун ка дургьуну бувцусса халкьуннал макьаннах вичIилий, миннулгу хъирив уттизаманнул макьаннал ритмардал чантI учин буллай. Видеопроектрал каширду ишла дурну, залданувуцири тамашачитал джазрахун бивунни ларгмур ттуршукулул 20-30-ми шиннардийсса Европанавун ва Латинский Американавусса Бразилиянавун, Кубаннавун, классикалул макьаннахун дунияллий машгьурсса личIи-личIисса шагьрурдайн, халкьуннал макьаннахун – жулва аьзизсса Дагъусттаннал зунттал тIабиаьтрайн сайрданий. Вай макьаннал ва ритмардал дянивсса тапаватшиву хъуннанугу, инсаният ва инсан цува лявхъуния шихунай макьаннугу, шеърирдугу, балайрдугу, магьирлугърал циняр караматругу ва дунияллийсса ца яла бюхттулсса – ччаврил асардан ва хъамитайпалун хас дурну душиву тасттикь хъанай бия.
Барча, хъамий, цал ттигу зул байран!