Мартрал 13-нний МахIач­къалалив «Апельсин» Машлул ва выставкалул комплексраву шадлугърал тагьарданий тIиртIунни ирглийсса, ва ххуллухрив юбилейралмур, выставка «Деловой Дагестан – 2013».

Бадрижамал Аьлиева
АцIулчинсса «Деловой Дагестан – 2013» выставка тIитIлатIисса шадлугъравух гьуртту хьунни ДР-лул ХIукуматрал Председательнал хъиривчу Абусупиян Хархаров, ДР-лул промышленностьрал ва энергетикалул министр Ризван ГъазимахIаммадов, ДР-лул машлул ва кьатIаллищалсса экономикалул дахIавурттал министр Юсуп Умамов ва мукунма цаймигу.
ДР-лул Президентнал, Халкьуннал Мажлисрал ва ХIукуматрал чулуха махъ лавхъунни Абусупиян Хархаровлул. Гихунмай махъру лавхъунни «КЭМЗ» концерндалул гендиректор Ибрагьим АхIматовлул, МахIачкъала шагьрулул бакIчинал хъиривчу ХIусман ХIусмановлул, Ставрополлал крайрал ва Чачаннал республикарттал вакилтурал.
Махъру лавхъми цинявппагу чIурчIав дуллай бия ва выставкалул, уку-укунсса цаймигу иширттал, агьамшиврий, миннул республика хьхьичIуннай давриву, мунил цIа ххуй чулий машгьур давриву хъунмасса кIану бугьлай бушиврий.
Выставка тIитIлай, аьдат­райн бувну, кьуркьунни ятIул лиссу. Му кьукьин лайкь хьунни Абусупиян Хархаров, Ризван ГъазимахIаммадов ва ХIусман ХIусманов.
Ва выставкалул сакиншинначину бур «Дагестан – ЭКСПО» Республикалул выставкалул ва маркетинграл центр, АьФ-лул Президентнал Ухссавнил Ккав­кказуллал федерал округрайсса Полномочный представительнал Аппаратрал, ДР-лул Президентнал ва ХIукуматрал Администрациялул, мукунма ДР-лул Экономикалул, ДР-лул Энергетикалул ва промышленностьрал, ДР-лул Строительствалул ва ЖКХ-лул, ДР-лул Машлул ва экономикалул кьатIаллищалсса дахIавурттал, ДР-лул Печатьрал ва информациялул министерстварттал, ДР-лул ЧIиримур ва дянивмур ишбажаранчишиву хьхьичIуннай даврил комитетрал, МахIачкъала шагьрулул Администрациялул чIаравбацIаврийну.
Выставка анжагъ «Апельсин» ТВК-рал вив дакъасса, дур кьатIувгу, му комплексрал хьхьичIсса майданнив. Мукун, кьатIув ккаккиялун дирхьуну дур шяраваллил хозяйствалул давурттаву дикIу, цайми-цайми иширттаву дикIу аьркин хьунтIисса уттизаманнул техника. Выставкалул давривух гьуртту хъанай, цалла продукция ва инсантуран дуллалисса хIаллихшиннарду ккаккиялун дихьлай бур жулла республикалул ва мунил кьатIувсса, хIатта чил билаятирттаяссагума, хъинну чIявусса предприятиярду. Миннувух къачансса бур ва выставкалувух цалчин гьуртту хъанахъиссагу.
Выставка лахъи лаган­тIиссар мартрал 15-ннийнин.