Февраль зурул 28-нний Оьруснал театрдануву диркIсса МухIсин Камаловлул концертгу, хьхьичIрасса шаннагу концерт кунна, Дагъусттаннал магьирлугърал тарихраву хьусса ца хъуннасса байрандалун ккалли дан бучIисса дия.

ХIакьину ца Дагъусттаннай ва Аьрасатнаву дакъассагу, щалла дунияллийра тIутIайх дичлай дур шоу-бизнес. Гьамин, мунил ялун бигьаврийну хъуннасса нигьачIавриву дур халкьуннал хIакьсса магьирлугъ. Балайчиталгу бур кIива журалул: цавай бур бюхъу-гьунар бакъасса, муницIунма халкьуннал магьирлугърал хъисвагу буруккин бакъа, анжагъ, арцу лякъин балай тIутIисса. На ми балайчитуран ккаллигума ци бави, миннайн заралчитал учара. Цанчирча цала цIу-цIанпIир бакъасса балайрдайну ялун нанисса ник къуркъа дуллай буну тIий. Цавайгу тIурча – халкьуннал магьирлугъ ядан цайрасса жаваблувшинна кIулну, муних бунияла буруглагисса. Мийннайн дазу дакъа барчаллагьрайгу бура, миллатрал хIакьсса магьирлугъ дуруччин талай бушиврухлу. ХIакьсса магьирлугърал кьимат ялавай багьлагьаврил ялув дакI цIуцIисса балайчитурал сияхIраву ятIулсса ххуттай кIицI дан бюхъанссар ДР-лул Халкьуннал артист МухIсин Камаловлул цIа.

Зулайхат Тахакьаева
МухIсин Камалов хар-хавар бакъа увххунни Дагъусттаннал магьирлугъравун ва ччясса мутталий мусил хIарпирдай чирчунни цалла цIа мунил тарихраву. ЧIявучин дакIний личIансса хьуссар мунал цалчинсса сахIналийн уккаву – му дия 2000 шинал Дагъусттаннал Халкьуннал шаэр Салимат Кьурбановал юбилейрал вечер. МухIсиннул италиянал балай учайхту цинявппа варх куну лавай бивзун, цукссагу хIаллай кьакъабагьавай хъатру ришлай бия. Ялагу, тамансса инсантал чIявуну дакIнийн бутлан бикIай МухIсиннул кIилчинсса сахIналийн уккавугу — кIава мажлисрая хъунма хIал къалавгун, «Илчи» кказит цIунил итабакьлай байбивхьуну 10 шин хъанахъисса юбилейрал мажлисрай, микрофонгу зия хьуну, кьакьари ххяххабуккавай МухIсиннул увкусса лакку балай. Тани МухIсин дахьа-дахьа ия тамашачитуран кIул хъанай. 2002 шинал цалчинсса «Щунудагъ» фестивальданий зунттурду, ххяллу кIиххядуклакисса чIуний, гьарца ущу-щулгъилун, аьрщи-ххюлун асар хьунсса такьвалий МухIсиннул лакрал халкьуннал ва италиянал балай учайхту, [pullquote]

2002 шинал «Щунудагъ» фестивальданий МухIсин Камалов уккайхту, Дагъусттаннай ххаллилсса чIу бусса балайчи ялун личаврия яла талихI бума инсан на ухьунссияв. Цанчирча театрду буний, чIурду ба­къар, чIурду буний, театрду бакъар. Мунияту ттун ччан бивкIуна МухIсин Камалов щалла дунияллун кIул уван. Ттул талихIиннаран, МухIсин кьамул увна Мариинский театрданувун».
Ширвани Чаллаев

[/pullquote]республикалул магьирлугърал деятельтуран бувчIуна Дагъусттаннал магьирлугъ дунияллул классикалул балайрдайну авадангу дурну, Аьрасатнал яла машгьурми театрдал сахIнарду хIайран бансса ва Дагъусттаннал цIа бюхттул дансса балайчи чIивисса лакрал миллатрава увкшиву. Мяйжаннугу, мукун хьугу-хьуссар. Аьрасатнал тахшагьрулул сий дусса театрдаву сайки гьарцагу шинал шайссар МухIсин Камаловлул концертру. Ларгсса шиналгу П. Чайковскийл цIанийсса театрдануву хьунни ванал цалалусса балайрдал концерт. Му бакъассагу, МухIсин гьарца зуруй гьуртту шай Москавлив Павел Слободкиннул цIанийсса центрдануву Марио Аьли Дюранд Сутуевлул концертирттай.
Ларгсса шинал МухIсин «Дагестан» тIисса балайлул ва къавтIавурттал ансамбльданущал гьуртту хьуну ур Турциянаву «Тюрксой» тIисса организациялул сипталийну дуллалисса концертрай. Парснал бугъазрайсса Оман паччахIлугърай хъанахъисса фестивальданий. Гьарцагу концертирттай учай­сса бур лакку балайрду.Тамашачитурангу лакку балайрду ляличIинува ххуй бизай, тIар.
ХIакьину МухIсин Камалов ур Дагъусттаннал ПаччахIлугърал опералул ва балетрал театрданул солист, чялишну зий ур ДР-лул ПаччахIлугърал хордануву, филармониялуву, «Дагъусттан» ансамбльдануву, «Горцы» квартетраву.
Дунияллул магьирлугърая­сса кIулшивугу, балай учаврил усттаршивугу ларайсса духьурчагу, МухIсин Камалов ур хьхьу-кьини дакъа цала чIунилгу, кIулшивуртталгу ялув ацIаву дакъа зузисса балайчи.
Февраль зурул 28-нний Оьруснал театрданувусса концертгу, хьхьичIрасса шаннагу концерт кунна, Д­агъусттаннал магьирлугърал тарихраву хьу­сса ца хъуннасса байрандалун ккалли дан бучIисса дия. Концерт сакин дурну дия ДР-лул ПаччахIлугърал филармониялул. ХIакьсса магьирлугъ шоу-бизнесрал бугъ дуллалаврия даиман буруккинттарайсса на, хIат-хIисав дакъа ххари хьура зал щапI куну бувцIуну ххал шайхту. Ванахха халкь бунияласса музыкалух бунияла мякь бувккун бивкIун. Гьай-гьай, кIулссаркьай миннан, балайчинал цивппа так цала бюххансса чIунийну бакъассагу, дунияллул магьирлугърал ляълу-жавагьирдуну хьусса балайрдавагума язи-язими кIурчIулттувух буккан бувну бикIантIишиву.
Мяйжаннугу, аваданъя концертрал программа. МухIсиннул чIарав бацIан бувкIмигу бия, цува кунма, бунияласса, гьунар бусса, балай учаврил усттарсса: ДР-лул ПаччахIлугърал хор, Дагъусттаннал Халкьуннал артист ТIагьир Курачевлул квартет, филармониялул солистал Ольга Шульц ва Аида Асекова. Концерт унгу-унгуну чIюлу дуруна Аьрасатнал халкьуннал артист, Аьрасатнал ва Да­гъусттаннал паччахIлугъирттал премиярттал лауреат Ширвани Чаллаевлул ва Дагъусттаннал Халкьуннал артистка Лариса ХIажиевал увкусса лакку балайлул, МухIсин Камаловлул хьхьичIунсса дус, Дагъусттаннал лайкь хьусса артист Марио Аьли Дюранд Сутуевлул увкусса испаннал балайлул, МухIсин Камаловлул, Марио Аьли Дюранд Сутуевлул ва Москавлия бувкIсса ванал продюсер Марина Георгадзел увкусса балайлул. Гьарцагу тамашачинал дакIнил синттайн дюхханну скрипкалул синттай руцлай ия Марио Аьли. МухIсиннул цала увкуна италиянал, неополитаннал, ингилис мазурдийсса, Муслим Магомаевлул репертуарданувасса балайрду, дунияллийх машгьур хьусса оперардал ариярду, цалва кулпат Аидал чивчусса мукъурттийсса балай. Гьарцагу балайлул тарихрая буслай ия, концерт дачин дурсса, Оьруснал театрданул артист Вахтанг Черегашвили.
Концерт дайдирхьуну къуртал хьунцIа щилчIав я бархI сукку къабувнуккива, ягу я ляпI учин къабувнуккива, я зимиз левххун нанисса чIу залдануву бакъая. Гьай-гьай, фонограммагу дакъа, оркестрданухунсса концертирттал жува хъихъи бувнугу бакъарухха. Щалла концертрай Дагъусттаннал халкьуннал артист МахIаммад Абакаровлул каялувшиннаралусса эстрадалул ва симфониялул оркестр руцлай диркIшиву бусан хъамабитавай ливчIунни. МухIсиннул гьарцагу концерт ва оркестрданухунни дайссача.
Гьарзад ххуйя, амма МухI­синнул лакку балай учиннин ссавур дакъа ялугьлай бивкIми тамашачитал махIрум хьуну бия.