МахIачкъалалив «Дагестан» РИА-лул конференц-залдануву хьунни граждан общество лядуккавриха ва инсаннал ихтиярду ххалдигьавриха зузисса Аьрасатнал ПрезидентначIасса Советрал вакилтал гьурттусса пресс-конференция.

Вайннавух ия АьФ-лул лайкь хьусса юрист Сергей Пашин, «Независимый экспертно-правовой совет» жяматийсса организациялул правлениялул председатель Мара Полякова ва Аьрасатнал МВД-лул Элмийсса центрданул Академия управлениялул хьхьичIунсса элмийсса зузала ва Аьрасатнал Президентнал СКФО-рай правопорядок­рал дузалшиннарал ялув ивтсса Координациялул совещаниялул вакил Расул Кьадиев.
Пресс-конференциялул байбихьулий Советрал экспертътурал кутIану бувсунни Аьрасатнал ПрезидентначIасса граждан общество лядуккавриха ва инсаннал ихтиярду дуруччавриха зузисса Советрал даврия. Вайннал бусаврийну, Советраву зий усса ур 62 инсан ва мунил хахливу зий бусса бур 12 комиссия. Аьмну Советрал ххалдигьайсса дур личIи-личIисса иш-тагьарду, цивгу циняр граждан обществалуцIун ва инсаннал ихтиярду дуруччаврицIун дархIусса. Советрал бувсса гьарца шаттирая, дурсса даврия бусайсса бур Советрал ва Кремльданул сайтирдай.
Советрал ххалдигьайсса давурттая буслай, Мара Поляковал кIицI лавгунни, ва сакиншиннарал вакилтурал судьятурал, прокурортурал, адвокатътурал ва ихтиярду дуру­ччай органнал зузалтрал дяниву ччя-ччяни анкетированиярду ва личIи-личIисса хъиривлаявуртту дайшиву.
«Укунсса давуртту дурну махъ жу ялун личин бувай­ссар ччясса мутталий дузал бан багьлагьи­сса Аьрасатнал обществалул агьамми масъалартту ва «цIуцIи кIанттурду», — увкунни Советрал председательнал.
Граждан общество лядуккан дансса чаранну кIицI лаглай, Мара Поляковал чIурчIав дурунни, билаятрал каялувчитуращалсса ихтилат бакъа му даву бакIуйн дуккан дан къабюхъайшиву.
«Вай кIивагу чуллал дяниву цаннан ца бувчIинсса ихтилат бакъашиврул масъала ца Ккав­кказнаву бакъасса, хьунабакьай Аьрасатнал цайми-цайми регионнайгу. Вай гьантрай Дагъус­ттаннайн бувкIун жущал хьунсса хьунабакьавурттай жу ца яла хьхьичIва-хьхьичI гьаз банмур суал, жяматирттансса майданну (общественные площадки) баврияссар бикIантIисса», — бувсунни Мара Поляковал.
Советрал гайми экспертътуралгу Мара Поляковал кумунил ялун ххи бувунни цалва-цалвами пикрирду. Хаснува Александр Зиминнул кIицI лавгунни, ттизаманнул шартIирдаву обществалул гьурттушинна дакъа цуппа-ца масъала щаллу бан къабю­хъайшиву.
«Жу дурсса цIуххавурттал хIасиллайн бувну, аьрасатлувтурал пикрирдайну хIу­ыкуматрал ца яла агьаммур масъала-коррупция душиву тасттикь хъанай бур. Му иширал сававгу дур каялувшинналул давриву чIярусса диялдакъашивуртту душиву. Ми диялдакъашивуртту духлаган дансса цуппа-ца шаттирал мяъна дакъассар обществалул гьурттушинна къадулларча», — увкунни А.Зиминнул.
Гихунмай экспертътурал Дагъусттаннал СМИ-рдал журналистътурал суаллахьхьун жавабру дуллунни.
Аьрасатнал циняр регионнава граждан общество чанссарагу чантI увкусса, инсаннан цалла ихтиярду кIулсса ва ми дуручлачисса регион цумур дур, тIисса суалданун Мара Поляковал бувсунни, ва ишираву, вайми регионнах бурувгун, Пермский крайрай къулайсса тагьар душиву.
Шикку дакIнийн бутан, жулла республикалийн бувкIсса экспертътурал комиссия хьунабакьинтIиссар ДР-лул Прокуратуралул ва МВД-лул каялувчитуращал ва мукунма республикалул вузирдал студентътуращал ва преподавательтуращал.