Агьали цIусса минардайн бизан буллалийни, хьхьичIва-хьхьичI, микку бан аьркинну бикIай азархана ва школарду. Ва кIану хIисавравун лавсун, ЦIуссалакрал агьалинан тIайлабацIу хьуссар учивияв жу. Новостройрайсса сайки циняв школардайн бивру дукIу-гьашину, шагьрурдал школардайн заназиминнал ва нитти-буттахъал дакIру мяш хьун дуллалисса даражалийсса школартту бур. Курорт-санаторий кунма ххуйсса кIанай бувсса азарханагу, рищунсса аьй дакъа, ххуйсса хьуну бур.

ЦIуссалакрал райондалул №1-мур азархана (укун учай ванийн), зун байбивхьу­ссия 2009 шинал. Мукьра отделениялий (хирургиялул, неврологиялул, терапевтиялул ва оьрчIанмур) бур 50 къашайшалансса кIану. Азарханалий зий бур кьунияхъайсса хIакинтал.
ХIакьинусса кьини му хъанай бур арулазара инсаннан ккаккан бувсса азарханану, цIусса миналийн бивзминнан ва хьхьирил дазуцIух яхъанахъиминнан. ЦIуссалакрал агьали Новостройрайн щаллуну бивзун къуртал шайхту, гийхсса агьалинал аьдад кьуазаруннийн лахъантIиссар тIий бур. Мунияту цIу-цIусса отделенияртту буллан дакIний бур.
«Новостройрайсса, оьрчI­ру бан нанисса ни­ттихъан къулайшиву дакъар, МахIачкъалаливсса роддомир­ттайн оьрчIру бан занай, минналгу, жулгу мурадри роддомрансса къатри даву, гьашину пландалувун дуртун дуссар ми къатри, — тIий бур азарханалий каялувшиву дуллалисса Исрапилова Булбул. – На ми ниттихъул МахIачкъалаливсса роддомирттайн тIайла буклай, микку кIантту буллай бикIара».
Новостройрай ялапар хъанахъисса сайки гьарца инсаннан кIулли Булбул ХIасановнал телефондалул номер. Азарханалул даву лавайсса даражалийн гьаз дурсса, бюхъу-хIарачат бусса ва цIусса миналийн бивзминнай дакIцIуцIаву дусса, цийрасса жаваблувшинна кIулну къуццу тIутIисса хIакингу, каялувчигу бур. Азархана щаллу бан багьлай бур тамансса оборудованиялул: УЗИ-аппаратирттал, флюорографрал. Аьркинну дур стоматологиялул оборудование ва эндоскопиялул установка. Аьркинну бур анаварсса кумаграл люкс-классрал машинарду ва реамобильлу. Гьаннайсса, бувар ттигу «ламу лавхъун тий бацIан». Азарханалул коллектив хIарачатрай бур цIусса миналийн бивзсса инсантал рязийну личIанну даву дуван.
Райондалул администрациялул бакIчи ХIажи Айдиев ия, федерал трассалучIасса азархана бухьувкун, аварияртту, апатIру хьусса инсантуран багьайкунсса кумаг бувансса даражалийсса, ттизаманнул оборудованиялул лащу-щаллусса реанимациялул ва хирургиялул отделенияртту бикIан багьлай бушиву райондалул хъуниминнангу бувчIлай бур, ми цимурцаннул дузал баврил хъирив буккан Москавлив Минздраврайн гьан дакIний буру тIий.
«Къашайшалтран УЗИ бишин МахIачкъалалийн занан багьлай бур, шикку УЗИ-аппарат бакъа. Цайми поликлиникардайн, азарханардайн къабувкнува шиккува щаллу хъанарча, агьалинан хъуннасса къулайшинна хьунссия», — тIий ур азарханалий сантехникну зузисса 1-мур ЦIувкIратусса Оьмаров ХIасан.
Жугу умудрай буру Новостройрайсса азархана республикалул азарханардаву ца яла хьхьичIунмур хьунтIишиврийн.