Недавно я побывалана благотворительном мероприятии в «Центре социальной помощи семье и детям»в Новострое.Необычность этого праздника заключалась стом, что инициатором мероприятия были не работники центра, а жители села Чапаево. Гендиректор ООО «Нормо» меценат Курбанов Камалутдин Амирбегович изъявилжелание помочь устроить праздник для детей-инвалидов. Ну и конечно, руководитель Центра Абидат Абдуллаевна с радостью поддержала идею и вместе со своим коллективом помогли организовать праздник.
Патимат Рамазанова
«ЦIусса шинал байрандалул бухкIуллий чIа увкумур табунугу щаллу шайссар» тIисса махъру жунма, хъуниминнан, оьрчIниява дакIний личIай. Тасса-тарив жува кунма вай гьантрай жулва оьрчIру ва оьрчIал оьрчIругу бия Дякъил Ттаттахь бахшишругу, личIи-личIисса мурадругу щаллу хьуннав тIий, чIа тIий. Хьул-умудрай. Магьраву кунмасса иширттайн вихну. Му вихшала бакIуйн дуккан дуваймигу бухьувкун жула чIарав, лагма-ялтту. Буниялттунгу, бурхха хIакьинугу жулва лагма-ялтту уздансса, чумартсса тIуллу дуллалисса, Дякъил Ттаттахъул кунма сахаватсса инсантал.
Ттигъанну кунма Новостройрай, Ниттихъан ва ОьрчIан социал кумаг буллалисса Центрданий (Центр СПС и Д) хьунни агьалинан дакIниву ххуймунийнсса вихшала цIакь дуллалисса мероприятие. Байран. Ва ххуллух му байран кIицI лавгсса Центрданул зузалтрал сипталийну хIасул дурну дакъая. Ххуй-ххуйсса мероприятиярду дувай чIун-чIумуй кIа Центрданул коллективрал, мюхтажминнан ка-кумаг буллалисса, иширайну, мукъуйну дакI хьунмур буллалисса. Ва базилухмур мероприятиялул сиптачи ия Чапаевкаллал шяравасса, «Норма» ООО-лул директор, меценат Кьурбанов Камалуттин Амирбаглул арс. Мунан пикри хьуну бия мушакъатсса оьрчIан цIусса шинал байран дуван. Центрданул хъунмур Аьбидат Аьбдуллаевнагу ххари хьуну бия мунал ххуйсса пикри бушиву кIул шайхту, щалва коллективгу лагма лаган бувну, кумаг бувну бия Камалуттин Амирбаговичлул оьрчIансса байран ларайсса даражалий тIайла дукканшиврул. 
Новостройрай яхъанай ур 35 мушакъатсса оьрчI, миннайн цинявннайн оьвкуну бия байрандалийн. Амма цинявннаща бучIан хьуну бакъая, мушакъатсса оьрчIащал кьатIув буккангу бигьа бакъархха. Байрандалийн увкIун ия 19 оьрчI, нитти-буттащал, уссу-ссуннащал. Байрандалийн бучIан къавхьусса оьрчIачIан бакIра-бакIрах шаппай бивссар центрданул зузалт, минначIан бахшишру диян дурссар.
ОьрчIру барча буллай, Камалуттин Амирбаговичлул увкуна: «ОьрчIниява зула бакIрачIан чIявусса бучIарчагу, зу вихну бикIан аьркинссару зува захIматшивурттаяр, цIуцIавурттаяргу ххув хьуну, зунмагу, жяматрангу мюнпатранну къуццу тIий яхъанантIишиврийн. Зухун цIуцIавуртту къадахчинтIиссар зула-зулами кIантту лякъин, зулвамур ххуллийх бачин».
Центрданул зузалтралгу биялсса хIарачат бувну бия оьрчIал байрандалия неъмат ласуншиврул, ми ххуйну бигьалаганшиврул.
Елка коридордануву къулайний бивхьуну бия, щябикIай кIанттурду хIадур бувну бия инжитсса оьрчIру къулайну щябикIан хьуншиврул.
Оьвкуну бия «Карамель» тIисса частный театрданул зузалтрайн. Минналгу хIарачат бия мушакъатсса оьрчIру хороводравун, тIуркIурдавун хIала буххан бан. Цалла цIуцIавуртту хъамарадиртсса кунма, къавтIий, балайрду тIий, шеърирду ккалай бия оьрчIру, кувннаяр кув лахъну викториналул суаллахьхьун жавабру дуллай, ссигъри бувчIлай. Байран ярг дуллай, лахъа-хъун дуллай бия Дякъил Ттатта, Марххаладуш, Карамелька ва Аслан. ОьрчIан цинярда персонажру ххуй дирзуна. Яла дакI даркьунуккива Карамелькалий, му хIазсса ва тяхъасса буну тIий. Гьай-гьай, циняв оьрчIан Дякъил Ттаттал дуллуна бахшишру, кIукIлу игрушкартту, нахIу-нацIулул кьуцуртту, ахъулсса.
Центрданул хъунмунил дакIнийхтуну барчаллагь увкуна оьрчIру гукун ххари бувсса Камалуттин Кьурбановлухь.
Ххари-шадсса оьрчIал суратру рирщуна Дякъил Ттаттащал ва Марххаладушнищал. ОьрчIал нитти-буттахъул, гъан-маччами зукьлай бия чIяру-чIярусса ххаришивурттая махIрум бувсса оьрчIан хъамакъаритансса тирхханну дуллусса Камалуттин Кьурбановлуйн ва мунал чIарав бавцIусса Аьбидат Аьбдуллаевнал щалвагу коллективрайн.
