Аьрасатнаву ХIукуматрал дуллусса къатри инсантурал цайнна лахъан даврил (приватизация жилья, квартир) чIун лахъи лаган даврил хIакъиравусса закондалул проектрацIун къадаркьуну дур Аьрасатнал ХIукумат. Муния бувсун бур парламентрал ЖКХ-лул комитетрал председатель Галина  Хованскаял «Российская  газета» кказитрай. ДакIнийн бутанну,  къатри цайнна лахъан даврил, яни къатрал заллухъру цивппа шаврил, чIун къуртал хъанахъиссар 2013 шинал мартрал 1-нний.

Г. Хованскаял мукъурттийн бувну,  ЖКХ-лул Комитетрайн муданма инсантурал чагъарду букIлайнма бур къатри цайнна лахъан даврил чIун уттигу лахъи лаган дара тIий. Му масъала щаллу бавриву цаппара дахханашивуртту хьуну дур. Уттинин диркIссар укунсса закон: 2005 шиная махъ общежитиялийн бивзминнахьхьун ихтияр дуллай бакъая яхъанахъисса къатлул (ягу къатрал) заллу хьун. Конституциялул Судрал хIукму хьуну бур, агана  инсантал общежитиярттавун бивзун бивкIун бухьурча ккаккан дурсса низамрай, миннахь ихтияр дуссар цивппа яхъанахъисса къатрал заллухъру хьун, яни гай цайнна лахъан дан. Цамургу дахханашиву – утти чIявусса оьрчI-бакI бусса кулпатирттахь ихтияр дуссар социалсса къатри цацIунна цIакь дан, хIатта миннан аьрщарал участок дулурчагума.

Дахханашивуртту хьуну дур, мукунна, къатри дакьин даврил хIакъиравусса къатрал закондалувугу. Му закондалий президентнал къулбас дантIиссар ЦIусса шин дучIаннинна, яни ва зуруй. Утти зивурдайсса къатраву яхъанахъиминнаща хьунтIиссар къатри дакьин дансса арцу салкьи дан 2 журалий. Цалчинмур журалий къатри дакьин дансса (капремонт) арцу салкьи дайссар (цIанагу мукун дайссар) региондалийсса операторнал, къатри тIурча дакьин дайссар графикрайну. Мунийн «Общий котел» учайссар. Утти га закон кьамул дурну махъ, инсантураща бюхъантIиссар  гьарца къатлул личIисса счет тIиртIуну, тикку цачIун дуллан къатри дакьин дансса арцу.