Декабрьданул 11-нний «Дагестан» РИА-лул пресс-центрдануву хьунни ДР-лул Президентнал грантирттан хасъсса пресс-конференция.
Тикку ихтилат буллай, Экспертътурал советрал секретарь Роберт Кьурбановлул бувсунни грантирттан хасну 12 млн. къуруширттал личIи дурну душиву. Ганал бувсмунийн бувну, экономикалун, дуккаврин, культуралун, элмулун, политикалун ва спортран, СМИ-рдан, чIиримур бизнесран хасъсса экспертътурал группарттал даврил хIасиллайн чул бивщуну, ДР-лул Президентнал грантру ласун ккаккан дурсса 384 проектравату 111 гьуртту хьунтIиссар конкурсравух.

Цалла ххал дурсса яла ххуй дирзми проектирдая бувсунни координатор-экспертътурал – СМИ-рдал проектирдал хIакъираву Алик АьбдулхIамидовлул, элмулул проектирдая – Шихсаид Аьбдуллаевлул, экономикалул проектирдая Сергей Дохоляннул, дуккаврил проектирдая – Халил ТIалхIатовлул.
Шихсаид Аьбдуллаевлул увкусса куццуй, Дагъусттаннал аьлимтурал цIушиннардан аьркинну бур паччахIлугърал чулухасса кумаг. Яла хъуннамур грант – 350 азарда къуруш – ккаккан дурну дур элмулул, фундаменталсса, конструктортурал ва издательствалул проектирдан.
Сергей Дохоляннул мукъурттийн бувну, ванан ххуй дирзун дур «Модный кластер» агротуризм тIисса проект. Амма мунинсса инфраструктура хIадурну дакъар.
Школардал ва вузирдал проектирдая буслай, Халил ТIалхIатовлул цIа дунни Нугъайнал, Буйнакскалул ва МахIарамккантуллал районнал школардал проектирдая.