Шагьрурдайсса школардай дуклаки оьрчIан ниттил маз лахьхьин баву ца агьамсса масъалалун ккалли буллалисса школарду МахIачкъалалив, гьай-гьай, къачIявусса бур. Миннувасса ца бур МахIачкъалаллал МБОУ №11 гимназия.
ПатIимат Рамазанова
Декабрь зурул 14-нний му школалий дия лакку мазран, «ЧIавалачин» журналданун хас дурсса байран. Му мероприятия хIадур дурну дия 1996 шиная шинмай кIицI лавгсса школалий лакку мазрал дарсру дихьлахьисса, 1-мур ЦIувкIратусса Рамазанова Самрат МахIаммадлул душнил. Мероприятие дайдишиннин, Самрат МахIаммадовнал бувсунни лакку мазрал дарсру душиву цалчинмур классрая тIайла хьуну, ацIния цалчинмур классравун бияннинсса дуклаки оьрчIахь. Лакку мазрал дарсру дишайсса кабинетгу хъинну ххуйну оьрчIи-чIюлу бувсса бия. Дия лакрал чичултран хас дурсса стендру, лакку мазран хасъсса чIирал кказитру.
Лакку маз ххирасса дуклаки оьрчIащал хьунабакьин школалийн бувкIун бия «ЧIавалачин» журналданул редактор, Дагъусттаннал халкьуннал чичу Мирза Давыдов, уттигъанну Дагъусттаннал Чичултрал союзрал лакрал чичултрал секциялул хъунаману ивтсса Илияс МахIаммадов, РГВК «Дагъусттан» каналданул лакралмур редакциялул хъунмур Марианна МахIаммадова.
Мирза Давыдовлул ва Илияс МахIаммадовлул оьрчIан лакку маз ххирану, хьхьичIунну бикIаву – му щалвагу миллатрал, нитти-буттахъал ва лакку мазрал учительтурал хьхьичI бавцIусса масъала хъанахъишиврий, лакку мазрал бучIантIимургу чаннасса, ххарисса бикIан аьркиншиврий чIурчIав дуллалисса ихтилатгу бувну, дурккуна оьрчIахь цалла чирчусса назмурду. Мирза Давыдовлул, Илияс МахIаммадовлул, Сиянат ХIажиевал, МахIаммад НикIаевлул ва цаймигу лакрал шаэртурал шеърирду бувккуна дуклаки оьрчIал.
7-мур классраву дуклакисса МахIаммадова Юланал бувккуна цала чивчусса интнихасса шеъри. Му шеъри жу «ЧIимучIалттул» хъаттирдай бищунну. Цалчинми классирттаву дуклакисса МахIаммадов Оьмарил ва МахIаммадова ПатIиматлул лакрал санна дурккуна, мува классраву дуклакисса Рамазанова Миланал Нураттин Юсуповлул «Щаращи» тIисса назму дурккуна.
Цанма ххирасса учительницал, Самрат МахIаммадовнал «Гъарал кIунтIру» тIисса назму дурккуна 7-мур классрал дуклаки душ МахIаммадова Асиятлул, бюрххулмур назму дурккуна 3-мур классраву дуклакисса, 1-мур ЦIувкIратусса Рамазанов Султаннул.
Ххюлчинмур классраву дуклакисса МухIадова Гульжанатлулгу назмурду дурккуна, 9-мур классраву дуклакисса МахIаммадова Заринал лакку балайрду увкуна. Арулчинми классирттаву дуклакисса душваврал лакку къавтIаву дуруна.
Дуклаки оьрчIахь ва миннал учительницахь барчаллагь тIутIисса ихтилат бувна тележурналист Марианна МахIаммадовал.
«Махъсса шиннардий, циняв мюрщи миллатирттавух, лакралмур миллатрал мазгу оьрчIал гъалгъалуву чан хъанахъисса чIумал, хъуннасса хьхьичIуннайшивуну хъанахъиссар дуклаки оьрчIал пасихIсса ниттил мазрах, миннал гъалгъа магьир баврих къулагъас дуллалаву. Мукунсса къулагъас, дакIцIуцIаву дуллалисса школалул дирекциялун хъунмасса барчаллагьри. ОьрчIан лакку маз лахьхьин бавриву хъунмасса бияла бур му мазрал дарсру дихьлахьисса муаьллимнахь, ва чулуха 11-мур школалун тIайлабацIу хьуну бур. Самрат МахIаммадовна оьрчIан вичIи дишин гъира багьанну, марцIсса, пасихIсса, авадансса лакку мазрай гъалгъа тIутIисса, пасихIсса шеърирду ляхъан буллалисса, оьрчIаяту тIалавшинна дусса муаьллим бур. ОьрчIал маз итххяххан баву мурадрай, оьрчIру лакрал литературалух къулагъас дуван байшиву чIалай бур, мазрал цIаний дакIцIуцIаву дусса муаьллим бур», — увкунни Марианнал.
Лакку мазрал байран дайдирхьуну къуртал хьуннин классраву щябивкIун бивкIунни №11 гимназиялул директор Дибирова Зугьра ЯхIиянал душ (ва Ккурклиятусса бур) ва завуч Аьлиева Аьшура Рашидлул душ.
Зугьра ЯхIияевнал ва Аьшура Рашидовнал цилвами ихтилатирттаву кIицI лавгунни цачIава ниттил мазру дихьлай бушиву Самрат МахIаммадовна кунма ниттил мазругу, миллатирттал тарихругу кIулсса муаьллимтал, гьамин ниттил мазурдийхчIинсса духьукун жагьилсса никирал цала миллатращалсса, буттал кIанттущалсса, ганил тарихращалсса ва гьанулущалсса дахIаву, мудангу къулагъас дикIантIишиву школалий миллатрал мазурдил дарсирдах, ва ми дарсру дишаврил даража гьаз бансса ххуллурду-чараннах.
