Лакку маз ябавриву, гьайгьай, хъунмасса бияла бур му мазраха зузисса идарарттахьгу. Миллатрал кказит-журналлахь чичрулиймур бияла бухьурча, Лакрал театрданухь ва радиолухь бур гъалгъалиймур бияла. Ялу-ялун захIмат хъанай бушиву чIалай бур Лакрал радиолул ва телевидениялул редакциярдан лакку мазрай пасихIну гъалгъа байсса инсантал лякъин. Ттигъанну МахIачкъалаллал №11 гимназиялул лакку мазрал байрандалийн бувкIсса «Дагъусттан» РГВК-лул «Аьрщи ва агьлу» передачалул автор Марианна МахIаммадова бия лакку мазрай ххуйну гъалгъа тIисса оьрчIру бакIрайн багьну, ххарину, миннахь лакку мазрал дарсру дихьлахьисса учительницайн ва мазрах къулагъас дусса директорнайн барчаллагьрай. Радиолун бикIу, миллатрал телеканалданун бикIу лакку мазрай ххуйну гъалгъа тIисса инсантал бакIрайн багьаву хъунмасса тIайлабацIулун ккалли буллалисса чIун дучIаву – му жува буниялттунгу пикрирдавун, буруккинттавун бутлатисса тагьар дур. Лакку маз къаххирану, къакIулну бушаврил сававрттуми жунна цинявннан дакIних кIулсса дур, ялу-ялун чан хъанай бур лакку маз кIулми. Шиная-шинайн учирчагу, мазрал бучIантIимуний дакIцIуцIаву дусса жулва цинявннал аьмсса масъалагу хъанай бур – чичрулийну бикIу, гъалгъалийну бикIу, лакку маз ябаву.
ЦIусса шинал бухкIуллий жулва коллегахъул барча буван на оьвчав Лакрал радиолул редакциялул хъунама редактор Тамара Закарьяевайн.
— Гьашину жул юбилейрал шинъя, Радиолун 80 шин хьуссар, амма юбилей дуван бувару, январь зурул 15-нний дуван дакIний буру, — увкунни Тамарал. – 2012-мур шинал ттулла давриву дакIний лирчIунни Уручравсса аьрххилийну. Аслийсса зунттал шяравалу дия, кIанил архитектуралул хIайран бувунну. Мукьттуршлийсса шинну хьуссар тIисса мизит бия, Аьли-ХIажи Ахъушинский муаьллимну ивкIсса. Уручуллал жямат буслай бия му мизитраву оьрчIний Гьарун Саэдов мюталимну ивкIшиву. Уручуллал жямат ттун хIал бавкьусса, ххуйсса жямат бивзунни. Лакралми районнайсса шяраваллах къулагъас дур, мунияту къалакралми районнайсса лакрал шяраваллавун биян личIинува гъира бикIай. Щаднивсса, Шаливсса аьрххирду кунма, Уручравсса аьрххи личIинува дакIний личIансса хьунни.
Ххуйчулиннайсса давурттив хьунни жучIа – ремонт дурну, аппаратура даххана дурну. ХIарачатрай буру жущара дан шаймур даву лажин кIялану дуван. Шаннагу районнайн оьвчару, кIий цукунсса-дунугу мероприятиярду хъанахъийни, культуралул отделлал хъуниминнал телефонну дуссар жучIа, оьвкуну миннахь цIухху-бусу байссар, телефондалийсса ихтилат чичин шайсса каши ишла дурну. Гьарцагу масъаларттал хъирив бавцIуну бикIару, экономикалул, багьу-бизулул, жагьилтал тарбия баврил. Мудангу цIуххару оьрчIру лагерьдайн тIайла буккаврия, хIукуматрал тIалавшинна дуллалисса программарду бартдигьаврил бущилия. Гьаннайсса, шаннагу райондалущал цIакьсса дахIаву дуссар.
КьурчIи бизлай бур жунма Лакрал радиолух интернетраву вичIи дишин къабюхълахъаву. Компания щаллуну цифровой журалийн дуркIукун, щаллу хьун аьркинссар му масъала. Лакку маз ххираминнаща гьарца кьини гьантлун 50 минутIрай интернетраву Лакрал радиолух вичIи дишин бюхълахъаву – му хьунтIиссар ххаллилсса давуну.
Цамургу ттунма кьурчIи бивзсса затраягу ихтилат бан ччива.
«Дагъусттан» РГВК-лий Дагъусттаннал Президентнахьхьун лакралми районну газрал блокадалуву лирчIун душаврил хIакъиравусса суал булунсса къаувккунни. Ялагу. Гъалгъа бия Ауховский район цIудуккан даврия. ЦIуссалакралмур район ядавриярив ихтилат бакъая.
Вайва вай масъаларттащал буххару жува цIусса шинавун, ларгсса шинал щаллу къавхьуми масъалартту цIусса шинал щаллу хьунхьуви тIисса умудгу личIай дакIурдиву. Мукунсса умуд бур ттул цIанагу. Щалвагу миллат барча буллай, ларгсса шинал щаллу къавхьуми мурадру цIусса шинал бартлаганнав, жувураа жулва миллатрахсса, мазрахсса ччаву хъунгу, цIакьгу хьуннав, тIий бура. Гьарцагу лаккучунал тIювай лакку маз нахIуну, ххирану личIаннав, цIуллушиву дулуннав, ххаришивуртту ялун дияннав.

Ихтилат бувссар ПатIимат Рамазановал