ЦIусса шинал бюджет ххалбивгьунни

Главная страница » ЦIусса шинал бюджет ххалбивгьунни

Декабрьданул 26-нний ДР-лул Халкьуннал Мажлисрал Председатель МахIаммад-Султан МахIаммадовлул каялувшиврулу хьунни республикалул парламентрал 18-мур сессия

Цалчин ххалбивгьунни «Дагъусттан Республикалул 2013 шинал бюджетрал ва пландалийн лавсъсса 2014 ва 2015 шиннардил бюджетирттал хIакъираву» тIисса масъала.
Масъалалул хIакъираву ихтилат буллай, ДР-лул финансирттал министр Аьбдуссалам ХIамидовлул бувсунни гьашину декабрьданул байбихьулий цIакь бувну бивкIшиву 2013 шинайнсса ва пландалийн лавсъсса 2014 ва 2015 шиннардийнсса бюджетру. Ганал мукъурттийн бувну, 2013 шинайн республикалун федерал бюджетравату 3 млрд. ва 628 млн. къуруширттал ххи дурну дур трансфетирттал лагру капитальный строительствалул объектру баншиврул.
Дурсса дахханашивуртту ва щаллу бавуртту хIисавравун ларсун, 2013 шинайнсса республикалул бюджетрал проектраву бур укунсса цифрарду: бюджетрал доход – 71 млрд. ва 37,6 млн. къурушру, миннуву дур федерал бюджетравасса трансфертирттал 50 млн. ва 428 млн. къурушру. Бюджетрава харж данмур – 78 млрд. ва 698,2 млн. къурушру, аьмсса дефицитрал лагру – 7 млрд. ва 660,6 млн. къурушру.
Финансирттал министрнал увкусса куццуй, 2013 шинал диял къархьуми (дефицит) арцу дучIан дантIиссар федерал бюджетрава кредитирттайну, ялагу акциярду бавххуну хьусса арцуйну, хьхьичIра республикалул бюджетрава дуллуну диркIсса кредитру махъуннай зана дурну щаллу бантIиссар бюджет. Социал иширттан личIи дантIиссар республикалул бюджетрал бачIиксса арцу – 47 млрд. къурушру.
ДР-лул экономикалул министр Марат Илиясовлул бувсунни цаппара районнан арцурду чанну, цайминнун чIяруну итадакьин ккаккан баврил сававрттаяту.
Сессиялий гьаз бунни цIусса миналийн дизан дуллалисса Храх-Уба ва Урьян-Уба шяраваллал хIакъиравусса масъалагу. Марат Илиясовлул бувсунни ми шяраваллу дизан дан 900 млн. къуруширттал аьркинну душиву, масъала цIана ххалбигьлай бур АьФ-лул ХIукуматрай.
Яла ихтилатру бувсса депутатътурал Назим Апаевлул ва Мурат Пайзуллаевлул депутатътурахь тавакъю бунни закондалул проектрацIун кабакьин. Бюджет кьамул бунни циняв рязину.
Депутатътурал кIилчин дуккаврийну цIакь дунни «2013 шинайнсса ва пландалийн лавсъсса 2014 ва 2015 шиннардийнсса ДР-лул Медициналул страхованиялул республикалул фондрал бюджетрал хIакъиравусса» закондалул проект ва «Дагъусттан Республикалул Президент махъун тIалав аврил низамрал хIакъиравусса» закондалул проект, «Дагъусттан Республикалий агьали бавтIсса мероприятияртту даврил цаппара масъаларттал хIакъиравусса» закондалул проект.
Сессиялий ххалдиргьунни цаймигу законнал проектру.