Гьашину ДГУ-лул лакрал отделениялийн дуклан увххун ур ххюя студент

Гьашину ДГУ-лул филологиялул факультетрал дагъусттаннал мазурдил отделениялийн кьамул увну ур увагу 40 инсан. ДикIайссия чIунну ва отделениягу щаллусса факультетну диркIсса, шивун дуклан буххан республикалул личIи-личIисса районная бувкIсса 120-130 абитуриентътурал аьрзри булайссагу. БучIантIимурвагу цукунсса хьунавав тIисса замана бухьувкун, лавгмуния гъалгъа тIутIаврил мяъна-мурадгу бакъа тIий, бусанну отделениялул так цIанасса чIумуя.


Шиная шинайн билаятрал кIулшивуртту дулаврил аралуву хъанахъисса дахханашивур­ттал ва цIусса тIалавшиннардал мугьали къавщуну къабивкIунни ва факультетрайнгу, хаснува да­гъусттаннал мазурдилмуницIун бавхIумунийн. Мивун дуклан наними чан шаврил сававрдугу цагу-кIирагу дакъар, школар­ттай ни­ттил мазрал дарсирдал сий лагь хъанахъаврия тIайла хьуну, учительтурал кадрарду гьарзану буну, ялун бувкIсса жагьил­сса учительтуран ссятру къадиял хъанахъаврийн бияннин.

Вай ва цаймигу масъалар­ттая цIуххингу, гьашину лакралмур отделениялийн дуклан бувхсса студентътуращал кIул хьунгу, ххюра шинай нава дуклай бивкIсса факультетрай хIакьину ци иш-тагьар дурив ххал дангу на уттигъанну хъамалу хьура шикку. Кьурахъул шиннардил хьхьичI кунма, бувкра аудиториярттавух ва факультетрал жанахIравух, щябивкIра лекциярттай ва чIиви-хъунсса ихтилатру барду шикку дарс дихьлахьи­сса преподавательтуращал. Ххари хьура миннавух ттущала дуклай бивкIсса, мазурдил элмулухун багьсса однокурсниктал лякъавриягу.


Гьашину лакралмур отделениялийн дуклан увкIун ур 5 студент, 2-мур ва 3-мур курсирдайгу дуклай бур ххю-ххюва душ, 4-мур курсирай тIурча дуклай бур ца душ, цагу академиялул отпуск ларсун бусса бур.


Гьашину лакралмур отделениялийн дуклан увкIун ур 5 студент, 2-мур ва 3-мур курсирдайгу дуклай бур ххю-ххюва душ, 4-мур курсирай тIурча дуклай бур ца душ, цагу академиялул отпуск ларсун бусса бур. Вайми миллатирттал мазурдил отделениярдах бурувгун, вайксса студентътал ца жуламур отделениялий бушивугу хъунмасса ишну чIалан бивкIунни ттун. Масалдаран, гьашину очныйну яруссанналмур отделениялийн дуклан увххун ур 6 инсан, къумукьналмунийн — 4, лазгиялмунийнгу- 4 инсан, даргиялмунийн- 6 инсан ва гьашину цуя-ца инсан дуклан увкIун акъар табасаранналмур отделениялийн.

Цаппара шиннардил хьхьичI тIиртIуну диркIсса рутIуллал, цIахъюрдал, азирбижаннал, чачаннал мазурдил отделениярттайнгу вай махъсса шиннардий дуклан ччиминнал набор хьуну дакъар. Факультетрай дарс дихьлахьисса, дагъусттаннал литературалул кафедралул доцент, филологиялул элмурдал кандидат Аминова Ххазина МахIаммад-Загьидовнал ттущал бувсса ихтилатраву кIицI бунни, махъсса шиннардий цачIанма бучIайсса студентътал хъунмурчIин цIу миналийсса ЦIуссалакрал ва Бабаюртуллал райондалийсса лакрал къутаннал школарттал дуклаки оьрчIру бушиву.


ХIукуматрал кIулшивуртту дулаврил цIусса стандарт­ругу хIисавравун ларсун, ни­ттил мазрай­сса дарсру школарттай ссуссукьу дуркун, ми­кку зузиминнаннарагу ссятру диял къахъанай дусса дур.


– Цуксса хIайпнугу махъ шиннардий жучIан нажагьсса бакъа букIлай бакъар Лаккуясса дуклаки оьрчIру. Нава ва иширал хъирив лавну, бувчIунни ЕГЭ сававну, чIявуминнал 9 класс къуртал бувну, дуклан лаглай бушиву колледжирттавун ягу дурагу дуккаву кьаритлай бушиву. ЕГЭ дуллуну, школа къуртал бувми оьрчIалгу чIалай бур язи бугьлай бушиву республикалул кьатIувсса хьхьичIунсса вузру. ХъунмурчIин медициналулсса, – буслай бур ва.

Гьашину лакралмур отделениялул 1-мур курсирайн дуклан увкIун ур Сангардал школа къуртал бувсса КIундиннал къутандалиясса МахIаммадов Имран, цIуминалийсса Шушиннал школалиясса Айдиева Аминат, ГьунчIукьатIрал школалия­сса Юсупова Щаза, Кьубиял школалиясса Ссунгъурова Лайла ва ДучIиннал школалиясса Аьзиева Аьйшат.
Ххазина МахIаммад-Загьи­довнал бусаврийну, вайннан ши­кку дуклансса оьрчIру ххал буллан, ми язи бугьлан багьайсса бур школарттай дуклай бунува ниттил мазрал олимпиадарттай ва личIи-личIисса конкурсирттай итталун багьну. Факультетрал преподавательтурал школарттайсса учительтурахьсса тавакъюгу бур, ла­кку мазрал олимпиадарттай гьур­тту хьун гьан буллан гихунмай шиккун дуклан бучIансса, ниттил мазраха зун гъира бусса оьрчIру.

Ттущалсса ихтилатраву да­гъусттаннал мазурдил кафедралул хъунама, филологиялул элмурдал доктор, Муса БахIам­мадовлул бувсунни, хIакьину отделение зий души­ву циняр цаятурасса тIалав­шиннарду би­ттур дуллалавриха. Шиная шинайн шиккун кьамул буллали­сса студентътурал сияхI чIири личIлачIисса ишгу ва бахIлай ур дагъусттаннал мазурдил факультетну бивкIсса, 90-ку шиннардий итабавкьу­сса пишакартал цIана школар­ттай зий буну, учительтал биялну бушивруцIун.

ХIукуматрал кIулшивуртту дулаврил цIусса стандартругу хIисавравун ларсун, ни­ттил мазрайсса дарсру школарттай ссуссукьу дуркун, микку зузиминнаннарагу ссятру диял къахъанай дусса дур. Ссу­ссукьушиву хьуну дур школар­ттахьхьун 5 кьини зун­сса ихтияр дуллусса иш сававнугу. ЦIана ниттил мазрал дарсру дихьлахьисса учительтал хъунмурчIин бусса бур оьрмулул 30-50 шиннардивусса, мунияту учительтал хIадур буллансса тIалавшинна дакъа тIийгу отделениялул сий лагь хъанай дусса дур.

Муса БахIаммадовлул бусаврийну, отделениялийн чансса студентътал букIлакIаврил ца цамургу савав дусса дур, школарттай дуклаки оьрчIал ЕГЭ дулунсса дарсирдавух нажагьссаннал дакъа язи къадугьлагьаву литературалул дарсру.

Литературалул ЕГЭ ду­сса дур къабигьасса, чIявусса лу­ттирду бувккуну, миннуясса кIулшивуртту дикIан аьркин­сса. Язи дургьуминналгу аьркинссаксса баллу биял къавхьуну, гуманитар элмурдал факультетирттайн буххан къавхьусса чIявусса ишру бикIайсса бур.
— ЯлунчIин литературалул ЕГЭ дулун ккаккан бувну бур 40 балл ласунну. Му бур мунил «порог». Уттинин бивкIсса 36 баллвагу гуж-хушрай ласлай буссия республикалул школарттай, – бувсунни ванал.

Бувсунни кафедралул хъунаманал, отделениялул хъунна­сса дахIаву душиву шикку дуклай бивкIсса выпусниктуращал, цIана щархъаву зузисса учительтуращал. Дувайсса дур вайннал цачIусса мероприятияртту, конкурсру ва цаймигу цаннан ца бучIи лякъинсса батIавуртту.
Дуккаврил шинал мутталий отделениялул сакин дувайсса дур цала студентътуран диалектрал, фольклорданул ва педагогикалул практиктикардугу. Гьашинуми практикарду вайннал хьуну дур щархъаватура дистанциялул режимрайсса.

— Жул отделениялий элмулухун машхул хьун гъира бусса жагьил­сса пишакартуран кумагран итабакьайссар «Жагьилсса лингвистнансса чичрурду» тIисса журнал. Муний рищайссар студентътурал макьалартту ва миннал дур­сса хъиривлаявуртту. Шикку зузисса пишакартуран, методистуран ва аьлим­туран цIа куну итабакьай­ссар «Вопросы кавказского языкознания и тюркологии» тIисса сборникгу. Ваний рищайссар учительтурал тIайла дурксса оьрус мазрай­сса макьалартту дакъасса, дагъу­с­ттаннал миллатирттал мазурдий­сса макьаларттугу, — бувсунни М. БахIаммадовлул.

ДГУ-лул каялувшиндаралул муданнасса къулагъасралу бу­ссар ва отделениялул студентътал. ЧIун-чIумуй дувай­ссар республикалул Миннацращалсса, Минобрданущал­сса мероприятиярдугу. Гьуртту шайссар дагъус­ттаннал миллатирттал мазурдицIун дархIусса батIавурттай ва шадлугъирттайгу. Масалдаран, вайми факультетирттах бурувгун, так ва отделениялул ва математикалул факультетрай дуклаки­сса студентътуран булайсса бур кIилийнусса стипендия. Факультетрал бикIу, отделениялул бикIу оьрмулуву чялишну гьуртту хъанахъисса студентътуран дусса дур ххуйсса личIи-личIисса хIаллихшиннардугу.

ТIайлабацIу баннав ши­кку дуклакисса студентътуран ва вайннахь дарс дихьлахьисса хIурмат лавайсса преподавательтурангу. Зул захIматрал кьимат лахънува битаннав.

Читайте также: