«Воспевшие Дагестан» тIисса Республикалул шамилчинмур театрал фестиваль-конкурсрай А. Къапиевлул цIанийсса Лакрал паччахIлугърал музыкалул ва драмалул театрданул жагьилсса актриса, Дагъусттан Республикалул лайкь хьусса артистка Зинаида Чавтараева лайкь хьунни «Хъамитайпалул яла ххуймур роль» тIисса цIанин, «Ччаву ва макь» тIисса спектакльданувусса рольданухлу .
Зулайхат Тахакьаева
Актрисан диплом ва арцуйнусса премия дуллай,
ДР-лул Театрал ишккаккултрал союзрал хъунама, Аьрасатнал халкьуннал артист Айгум Айгумовлул кIицI лавгунни ванил яргсса гьунар ва Гъумучиял ПатIиматлул роль дюхханну дугьан бюхъаву.
Гьамин, ва роль хьуссар ацIния мяйра шинал оьрмулуву Зинаидал дургьусса цалчинсса агьаммур рольну.
Тания шинмай ацIния шанна шинал мутталий жагьилсса актриса тамашачитуран ххира хьунни Джульеттал (У. Шекспирдул «Ромео и Джульетта»), Аделал (Г. Лоркал «Бернарда Альбал къатта»), Бахул (Б. Рамазановлул «Хъявринсса ччаву), Офелиял (У. Шекспирдул «Гамлет»), Марьял (Гоголлул «Ревизор») ва цаймигу сипатру усттарну ккаккан даврийну.
ДакIнийхтуну барчагу буллай, чIа тIий буру Зинаидан цIуллушиву ва тIайлабацIу. Яргсса хьуннав вил творчествалул вания тинмаймур ххуллугу!
