«МахIачкъала лайкьссар магьирлугърал центрну хьун»

Дагъусттаннал ХIукуматрал хъунаманал цалчинма хъиривчу Анатолий Карибов хьунаавкьунни VI-мур дунияллул халкьуннал дянивсса оьрус театрдал фестивальданул жюрилущал. Хьунабакьаврий гьуртту хьунни ДР-лул культуралул министр Зарема Буттаева, фестивальданул сакиншинначитал — М. Горькийл цIанийсса Оьруснал паччахIлугърал театрданул директор Тимур МахIаммадов ва хъунама режиссер Скандарбек Тулпаров.


Зулайхат Тахакьаева
Фестиваль наниссаксса хIаллай Оьруснал театрданул сахIналий ккаккан бунни оьруснал классикалул ва ттизаманнул драматургиялул произведениярттаясса спектакллу.
Оьруснал театрданул ккаккан бунни спектакллу «Васса Железнова» ва «Ричард III».
Вице-премьернал лавайсса кьиматрай кIицI лавгунни магьирлугърал инсаннал оьрмулуву бугьлагьисса кIану, муних паччахIлугърал хъунна­сса къулагъас дуллай бушиврий чIурчIавгу дуллай.

«Жу хъинну ххариссару зу Дагъусттаннай кьамул бан. Гьашинусса шинал чIярусса давур­тту дан дакIний буссия магьирлугърал оьрмулуву, чIярусса давуртту дурссар ва дуллай буссар «Культура» нацпроектрал лагрулий. Жапасса эпидемиологиялул тагьарданух къабурувгун, жу лякъарду дунияллул лагрулийсса хъунисса ишру дузал бансса ххуллурду, Роспотребнадзорданул тIалавшиннардацIун бавкьуну»,-увкунни вице-премьернал.
Зарема Буттаевал кIицI лавгунни Роспотребнадзорданул тIалавшиннардугу биттур дурну, республикалий чулийн ду­ккан дан бювхъуну бушиву хъунисса проектру: дунияллул халкьуннал фольклорданул ва аьдатирттал ХХ-мур фестиваль «Горцы»; VI-мур дунияллул халкьуннал дянивсса музыкалул фестиваль «Порт-Петровские Ассамблеи»; VI-мур духовой оркестр­дал фестиваль «Дагестанские фанфары».

— Бигьану бикIанссия пандемиялул тагьаргу багьана дурну, вай мероприятияртту гьашинусса къадурну кьаритангу, амма магьирлугърал ишкка­ккултрал хIарачатрайну бювхъунни вай фестиваллу цамур форматрай дуван, — ххи бунни министрнал.
— Агарда, зувира шинал хьхьичI театрал дунияллул пишакартурал Ухссавнил Ккав­кказнал театрал центрданун Ух­ссавнил АьсатIин ккалли бан тIий бивкIхьурча, хIакьину чIявуминнал мунин ккалли бантIиссар Дагъусттан, — увкунни Валерий Подгородинскийл.

Оьруснал театрданул бивхьусса У. Шекспирдул пьесалиясса «Ричард III» спектакльданун лавайсса кьимат бишлай, машгьурсса театроведнал кIицI лавгунни дагъусттаннал театрал магьирлугъраву ва спектакль хьушиву цIусса махъну, актёртуращагу му махъ усттарну ккаккан бан бювхъушиву.
Валерий Подгородинскийл ххи бунни спектакль билаятрал хъуншагьрулул театрдал сахIнардай ва «Золотая маска» тIисса Аьрасатнал миллатрал театрал премиялий ккаккан бан лайкьсса бушиву. Бувсунни цува рязину ушиву, онлайн-форматрал хасшивурттах къаурувгун, Да­гъусттаннайнгу увкIун, фестивальданий гьуртту хьун бюхъаврия.
Дагъусттаннайн билаятрал магьирлугърал цIанихсса иш­ккаккулт бучIаву хъинну агьам­сса иширан ккалли бунни Аьра­сатнал магьирлугърал бусравсса ишккакку Гулизар Султановал. Барчаллагь увкунни, республикалийн бувкIун, жула режиссертурал ва актертурал устталугъ хьхьичIуннай дансса мастер-классру бувсса пишакартурахь.

Режиссёр Ювеналий Калантаровлул бувсунни, МахIачкъала Ухссавнил Ккавкказнал магьирлугърал хъуншагьрулул цIанин лайкь хьуссар тIисса Валерий Подгородинскийл пикрилуцIун цувагу акьлай ушиву. Агьаммур чIурчIав ванал дурунни театрал магьирлугъ гихуннайгу хьхьичIуннай дуллан багьлай бушиврух. «Фестивальданул ца цамургу ххуйшиву ци дур чирча, шикку актертуращал хьхьичIунсса пишакартал зий бушиву. На маслихIат бавияв ва давривун Москав ва Питер шагьрурдаясса язими пишакарталгу кIункIу бан. Артистнан аьркинссар цала магьиршиву бусса оьрмулий ларай дуллан. Ттул пикрилий, зуща бю­хъанссия му даву фестивальданул гьанулий сакин дан. Фестиваль хьун аьркинссар, так ца театрал журалул дакъасса, маданиятрал, магьирлугърал ва гуманитар элмурдал фестивальнугу».

Аьрасатнал тележурналист ва актер Александр Мягченковлул кIицI лавгунни фестиваль, коронавирусрал инфекция ппив шавриясса ничIаврихгу къабурувгун, лавайсса даражалий сакин дан бюхъаву.
«Ва фестивальданул дур цилла лажин. На ттущава бюхъаймур банна фестивальдания ва Дагъусттаннал театрал оьрмулия аьрасатнал илданухь бусан»,- увкунни ванал.
Хьунабакьаврил жям дуллай, Анатолий Карибовлул кIицI лавгунни республикалий магьирлугърал иширттацIун дархIуну туризмгу хьхьичIуннай дан бюхъантIишиву.
Зарема Буттаева уттинингу хьунабавкьуссар фестивальданий гьуртту хъанахъисса магьирлугърал ишккаккултращал, буллуссар миннан барчаллагьрал чагъарду ва хъамакъабитулун­сса бахшишру.

Читайте также: