Марихуана лявкъуну бур
Октябрь зурул 12-нний ххалбигьавуртту дуллалисса Наркотикру ишакаш баврил ялув бацIаву дайсса управлениялул 4-мур отделданул зузалтран лявкъунни Къаякантуллал райондалийсса цаннал участокрай «марихуаналул» куннасса кьанкь дусса кьакьан дурсса ххяххиялул кьуцуру.
Участокрал заллу увцуну ур отделданийн, ххяххия дусса кьуцуру тIайла бувккун бур экспертизалийн.
Экспертизалул тасттикь бувну бур кьуцурттувусса 1639,27 грамм ххяххиялул мяйжаннугу марихуана бушиву. Ва иширал хIакъираву, АьФ-лул УК-рал 208-мур статьялул 2-мур бутIуйн багьлагьисса тахсир ккаклай, сукку дурну дур уголов дело.
Укунсса тахсир хьусса чIумал шанна шиная ацIра шинайн бияннин дуснакь бансса танмихI байссар.

Магъуя учIан увну ур гужрай
Октябрь зурул 13-нний Да­гъусттаннал Виваллил иширттал министерствалул дежурная частьрайн баян бувну бур МахIачкъалалив Расул ХIамзатовлул цIанийсса кучалийсса чIяру зивурду дусса къатрал магъуй инсан авцIуну ур куну. Миккун тIайла бувккун бур полициялул зузалт. Магъуй авцIуманащалсса ихтилат цаппара ссятурдий лахъи лавгун бур. Му чIумул мутталий полициялул зузалтрал къатри вив лавсун бур.
Ссят 20.20 хьусса чIумал учIу тIий мютIи ан къавхьусса адимина, полициялул зузалтрал увгьуну, гужрай учIан увну ур.

Машина щун бувну бур
Октябрь зурул 12-нний МахIачкъалалив, Ярагъскийл цIанийсса кIичIираву, Лаващиял райондалиясса 64 шинавусса цаннал щун бувну бур машина (ВАЗ-2109) ххуллу лахълахъисса 36 шинавусса хъамитайпалийн. Му, цIунцIия хьуну, азарханалийн биян бувну бур.

Бомба къалявкъуну бур
Октябрь зурул 9-нний Цасса диспетчертурал къуллугърал номерданийн (112) оьвкуну бур, I-ма Петрдул кучалийсса кафелул чIарав бацIан бувсса машиналуву бомба буссар куну. Оператив группа гацIана бувкIун, кафегу, мунил лагмасса кIанттурдугу вив лавсун бур. Бомба къалявкъуну бур. ГацIана хъирив багьаву дурну, полициялул зузалтрал лявкъуну ур оьвкума.
Телефондалул заллу, колледжрал студент, цайра аьй да­къашиву буслай ур. КIия однокурсникнал, хъярч бан, цанмагу къакIулна, цала телефондалувух оьвкуну бур тIий ур му.
Хъярч ссайн буккан наниссарив бувчIукун, миннал бувсун бур хьумур телефондалул залуннахь. Му тIурча, нигьа увсун, оьвтIун ивкIун ур бомбалул хIакъиравусса хавар тIайла бакъасса бушиву бусан, амма чIал хьуну ур. Полициялул зузалт мугьлат бакъа баян бувмунил хъирив бивзун бур.
Гьантлул хьхьичI укунмасса иш хьуну бур Хасавюртуллал школалийгу. Учительнал телефондалийн оьвкуну бур школалийн ххя­ххан най бур куну. Полициялул зузалт мугьлат бакъа леххаврий бувккун, школалул къатрава инсантал буккан бувну, школагу, лагмасса кIанттурдугу вив лавсун бур. Ва баян бавугу щялмахъсса ляркъуну дур. Гьантлул дянив полициялул зузалтрал кIул увну ур баян бувма. Му ур миккува дуклакисса 14 шинавусса оьрчI. Дарсру къадишиншиврул оьвчав тIий ур.
Ва иширал хIакъираву сукку дурну дур уголов дело. КIицI лаган, Дагъусттаннай чIяру хьуну дур полициялул органнайн терроризмалул иширттал хIакъиравусса щялмахъсса оьвчавуртту.

Полициялул
зузалт оьрмурдац1а бан кьаст лархIуну дур
Октябрь зурул 12-нний ссят 01.15 хьусса чIумал «Кавказ» федерал ххуллий Къизилюртуллал райондалийсса Кульзеб шяраваллия арх бакъа документру ххал бан машина бацIан буллалисса полициялул зузалтрайн битавуртту дурну дур ца буссарив къакIулсса инсантурал. Полициялул зузалтрал ми кIиягу бивтун бивчуну бур. Зузалтран цанма зарал къавхьуну бур, машиналий ккуллардал ккутIру дурну дур. Битавуртту хьусса кIанай лявкъуну бур Макаровлул пистолет ва ккулларду.

ХIадур бувссар
Андриана Аьбдуллаевал