Казактурал магьирлугърал байран

Къизлардал шагьрулул стадиондалий уттигъанну хьунни Терскаллал казактурал культуралул фестиваль. Му хас дурну дия ДазуцIухсса ляличIисса округрал Къизлардал казактурал общество (Кизлярское особое приграничное окружное казачье общество) цIу ларгсса 30 шинал таварихран. Фестиваль хьунни ДР-лул Миллатрал политикалул ва диннал иширттал министерствалул биялалийну.


Бадрижамал Аьлиева
Байрандалий гьуртту хьунни Къизлар шагьрулул администрациялул бакIчи Александр Шувалов, ДР-лул миллатрал политикалул ва диннал иширттал министрнал хъиривчу Гьарун Давидов, Къизлардал райондалул администрациялул бакIчи Аким Микиров, Терскаллал казактурал аьрали обществалул атаман Виталий Кузнецов, райондалул администрациялул бакIчинал хъиривчу Ися Рамазанов, казачествалущалсса хIала-гьурттушиврул отделданул каялувчи иерей Павел Каликин ва м.ц.
Фестиваль дайдирхьуна Павел Каликиннул дурсса дуаьрдая.

Райондалул агьалинал цIа­ниясса махъ лавхъуна Аким Микировлул.
— Оьрмул-оьрмулухун буссар казактал цала Буттал кIанттул дазурду дуручлай бавцIуну, мунил рувхIанийсса хазнарду ябуллай. ЧIа тIий ура зунгу зула буттахъал бувсса аманатирттайн хаин къашаву, дакIнил кьянкьашиву ва творчествалувусса хьхьичIуннайшивуртту,- увкуна райондалул бакIчинал.
Шадлугърал официал бутIа сакин хьуну бия казактурал ттугъ буккан баврия, атамантурал лахълахъисса мукъурттия, казактуран багьлул ларайсса бахшишру ва дакI марцIну буллалисса къуллугърахлусса лишанну дулаврия, хъамаллурал барча бавурттая.

Фестивальданул лагрулий хьунни спортравусса бюхъурду, магьирлугъравусса гьунарду ккаккан буллалисса бяст-ччаллу. «Казачье подворье» ва «Уголок казачьего быта» тIисса цIардалу хьунни аслийсса культуралул выставкарду, мастер-классру. КутIану бусан, тIивтIуну бия Терскаллал казачествалул культура ва багьу- бизу ккаккан буллалисса майдан.
Фестивальданул гьарцагу гьурттучи лайкь хьунни Казактурал обществалул чулухасса барчаллагьрал чагъардан.

Читайте также: