Ларгсса арвахIкьини Дагъусттаннал БакIчи Владимир Васильев хьунаавкьунни цалчинмур группалул инвалидтуращал ва мукунма мушакъатсса оьрчIру тарбия буллалисса кулпатирттащал, яни яхъанансса магъи аьркинминнащал.
Владимир Васильевлул миннахьхьун дуллунни къатри ласунсса субсидиялул сертификатру. Республикалул хъунаманал кIицI лавгунни гьашинусса шин къуртал хьуннин аьмну 500 кулпат къатта-къушлил дузал бувантIишиву. Ларгсса шинал дуллуну дур республикалий 260 сертификат. Гьашину инвалидтал яхъанансса къатрал дузал бувансса программалунсса арцу ххи дурну дур.
Шиккува бусан, республикалул хъунама инвалидтуращал хьунаавкьунни хасну инвалидтуран хIалуну мажиб лякъинсса чарандалун тIивтIусса «Время перемен» тIисса социал кафераву. Ванащал бия ХIукуматрал хъунаманал цалчинма хъиривчу ХIажимахIаммад ХIусайнов, захIматрал ва социал иширттал министр Изумруд МухIуттинова ва строительствалул ва ЖКХ- лул министр Малик Багълиев.
