[dropcap]Р[/dropcap]еспубликалул агьалинан кумаг буван бувкIсса аьрали хIакинтал коронавирусрал азарданул къашавайсса дагъусттанлувтал хъин буллай ялув бавцIунува бур.
Уттинин Бущихъавсса ва Буйнакскаливсса госпиталлая, хъин бувну, итабавкьуну бур кIиттуршунниха ливчусса къашайшалт.
Дурусну ца зурул дянив. Уттигу хъин хъанай ур 45 къашайшала. Билаятрал Мюхчаншиву дуруччаврил министерствалул республикалийн тIайла бувксса арали хIакинтал так госпитальлай зузаврийну гьашиву дурну бавцIуну бакъар. Бригадарду бувну, кIани-кIанттурдайсса ФАП-ирттаву ва амбулаториярттавугу инсантал кьамул буллай бивкIссар.
Дянивну миннал уттинин ххал ивгьуну ур 1300 инсан. Дагъусттаннал агьали миннайн бусрав-барчаллагьрай бур, шагьрурдайн къабивнува, цалла цIуллу-сагъшиврул тагьар ххал дуван бюхъаврия. Ва ялагу, медициналул ва консультация хIисаврайсса кумаг бакъагу, аьрали хIакинтурал Дагъусттаннайсса уртакьтуран цанма кIулмургу лахьхьин буллай бур.
ДакIнийн бутанну, коронавирусрал азар ппив хъанай дачайхту, Аьрасатнал Президентнал тапшур бувну, Дагъусттаннай ччясса чIумул мутталий аьралий строительтурал госпиталлу бувшиву ва азарханардай кIантту бакъасса аварасса ппурттуву ми бучIи лявкъушиву. Хаснува захIматсса къашайшалт, МахIачкъалалийн къаххилайна, кIиккува хъин хъанансса хIалу дагьшиву Бущихъиял агьалинан.
П. Рамазанова
