[dropcap]И[/dropcap]юнь зурул 6-нний жулла республикалий байбивхьунни ихIсандалул акция «Испеки пирог и скажи спасибо» тIисса. Му хас бувну бур сайки кIива ва бачIи зурул мутталий коронавирусрал инфекциялущал талатисса медициналул зузалтран.
Зулайхат Тахакьаева
[dropcap]М[/dropcap]унил сакиншинначиталну бур Миллатирттал политикалул ва диндалул иширттал министерство Дагъусттаннал Хъаннил союзращал цачIуну.
Аьрасатнал Кьинилул хьунийн миллатирттал политикалул ва республикалул муниципал сакиншиндарал хъаннил советирттал вакилтурал барчаллагь увкунни коронавирусрал инфекциялул къашавайминнащал зузисса медициналул зузалтрахь.
Миллатирттал политикалул ва диндалул иширттал министрнал хъиривчу Арсен МахIмудовлул бусаврийн бувну, «Испеки пирог и скажи спасибо» акциялувух хIала бувххун бур ведомствалий зузисса хъами. Отделданул хъунмур Хасайбат Валиевал ва Дагъусттаннал Хъаннил союзрал хъунмур Интизар Мамутаевал каялувшиндаралу вайннал шавхьун бур мюрщисса ттугъал чIюлу бувсса 600-нниха ливчусса чуттурду, пирогру.
Аьрасатнал кьини ми биян бувну бур коронавирусрал азарданущал хьхьу-кьини дакъа талатисса МахIачкъала шагьрулул шанма азарханалул медициналул зузалтрачIан.
Пирог кьамул буллай, МахIачкъала шагьрулул Цалчинмур азарханалул хъунама хIакин ХIажимурад Маллаевлул барчаллагь увкунни акциялул сакиншинначитурахь. Ванал кIицI лавгунни азарханалул коллектив зий бушиву дакIнихтуну, цалла жаннай рахIму къабувну.
— Ва ишираву жун асар хьунни халкьуннал чулухасса кумаг.
Щалагу коллективрал цIания барчаллагь тIий ура акциялий гьуртту хьуминнахь. Зул къулагъасрал жул дакIру ххари дурунни. ХIакьину жунма исват хьуссар къювулул миллат цачIун байшиву. Муниву ттун чIалай дур общество даххана шаврил цIуллусса лишан. Жу тIурча, махъ буллай буру даин жяматрал цIуллу-сагъшиврул къаралданий бацIан, — увкунни ХIажимурад Маллаевлул.
