«Жува – Аьрасатлувталлу»

[dropcap]В[/dropcap]ай гьантрай жулва билаятрай кIицI ларгунни Аьрасатнал Кьини. Жулла республикалул шагьрурдай ва районнайгу хьунни му иширан хасъсса, «Мы – Россия» цIанилусса щалагу Аьрасатнал акциялул лагрулийсса шадлугъру.


Бадрижамал Аьлиева
ХьхьичIми шиннардий кунна, лахъа-хъунну, чIявусса инсанталгу гьурттуну кIицI къалагарчагу ва байран, цIанасса тагьаргу хIисавравун ларсун, шагьрулул инсантал хъанахъимуних буруглай бия цалва чIавахьулттава ва ларзурдала.

Республикалул хъуншагь­рулул мукьва кIанттай – Р. ХIам­затовлул цIанийсса проспект­рай ва У. Буйнакскийл, А. Ма­хIам­мадтIагьировлул ва М. Ярагъс­кийл цIанийсса кIи­чIир­ттаву хьунни ва Кьинилун хас дурсса шадлугъру.
Миннувух гьуртту хьунни Да­гъусттан Республикалул БакIчи Владимир Васильев, ДР-лул БакIчинал ва ХIукуматрал Администрациялул Каялувчи Владимир Иванов, ДР-лул ХIукуматрал Председательнал цалчинма хъиривчу Анатолий Карибов, ДР-лул Халкьуннал Мажлисрал председательнал цалчинма хъиривчу СайгидахIмад АхIмадов, ДР-лул виваллил иширттал министр Аьвдурашид МахIаммадов, ДР-лул культуралул министр Зарема Буттаева, МахIачкъала шагьрулул бакIчи Салман Дадаев, ДР-лул жагьилтурал иширттал министр Камил Сяидов, МахIачкъала шагьрулул Культуралул управлениялул начальник Фарид Абалаев. Шадлугъ дайдирхьуна Аьрасатнал гимн щаллу даврийну.
Хъирив дагъусттанлувтал Аьра­сатнал Кьинилущал барча буллалисса ихтилат бувна Владимир Васильевлул.
Ва кьинисса культуралул программалул лагрулий музыкалул номерду щаллу бунни М. Горькийл цIанийсса Оьруснал театр­данул, Дагъусттаннал опералул ва балетрал театрданул, Т. Мурадовлул цIанийсса Дагъусттаннал паччахIлугърал филармониялул артистътурал.

* * *
Республикалул районнай автоклубирттал сахIнардая ва кьини баллай бия Ватандалухасса, халкьуннал дянивсса дусшиврия­сса, билаятрал миллатирттал цашивриясса балайрду.
Хивуллал, Рутуллал, Къаяккантуллал, ЦIуссалакрал ва Гумбетуллал районнал фольклорданул ансамбльлал солистътурал ва таксса балайчитурал щаллу бунни Ватандалухасса балайрду. Шадлугърал иширттавух гьурттушиву дурунни ЦIуссалакрал ва Гумбетуллал биб­лиотекарттал зузалтралгу.
­