[dropcap]М[/dropcap]артрал 17-нний ДР-лул Халкьуннал Мажлисрал Председатель Хизри Шихсаэдовлул дунни МахIачкъала шагьрулул бартбигьин захIматсса масъаларттал хIакъиравусса батIаву.

[dropcap]М[/dropcap]уний гьуртту хьунни хъуншагьрулул бакIчи Салман Дадаев, ДР-лул ХIукуматрал Председательнал 1-ма хъиривчу ХIажимахIаммад ХIусайнов, ДР-лул Халкьуннал Мажлисрал Председательнал хъиривчу Камил Давдиев, парламент­рал комитетирттал вакилтал, республикалул цаппара министерстварттал ва федерал ведомстварттал вакилтал, аьлимтал.

Хизри Шихсаэдовлул бувсунни, бувну бунувагу, амма зий ба­къасса социал объектру бушиву – ми бур оьрчIал багъру, школарду, Республикалул онкологиялул центрдануцIунсса къатта. Мунал тIимунийну, кIива оьрчIал багъ 340 кIану бусса (ЦIусса Кяхулайрай ва ипподромрал райондалий) бувну бунагу, зун бюхълай ба­къар министерстварттал, идарар­ттал ва МахIачкъала шагьрулул дянив бакьу-къабакьулийсса ишру сававну.

Аьркинни яла кутIасса чIумул мутталий ми оьрчIал багъру зузи буван, миннунсса тIалавшингу хIисавравун ларсун. Так ца МахIачкъалалив оьрчIал багъирдавун ирглий бавцIуну бур 18 азара оьрчI-бакI.
Камил Давдиевлул бувсунни оьрчIал багъру зий бакъашиврул сававирттая. Мунал тIимунийну, МЧС-рал ва Роспотребнадзорданул ми объектирдан ккаккан дурсса диял дакъашивуртту духлаган къадурссаксса оьрчIал багъру зун къахъанай ливчIун бу­сса бур.
ХIажимахIаммад ХIусай­новлул бувсунни, лахъи лаган къабивтун, лякъинтIий бушиву диял дакъашивуртту духлаган дувансса арцу ва оьрчIал багъру зий байбишинтIий бушиву.

[dropcap]Я[/dropcap]ла Хизри Шихсаэдовлул гьаз бунни МахIачкъала шагьрулул каялувшиврул система ххуй-хъин даврил масъала. Мунал тIимунийну, шагьрулун аьркинни арцуйнусса кумаг буван мунил инфраструктура, социал объектру, ххуллурду ва цаймигу сооруженияртту даншиврул.
Салман Дадаевлул бувсунни шагьрулул арцул дузалшиврул тагьардания ва захIматшивурттая.
БатIаврий ихтилатру бунни цайминналгу.

ХI. Аьдилов