Ассаламу аьлайкум, ххирасса лакрал жямат!
ХIакьину на зухь, гьар мудан кунма, «Лакку билаятрал рухI» группалувусса цIусса хаварду къабусланна.

Ттун бусан ччива жула группалуву цинявннан ххирасса ва хIурмат бусса Гулизар Башанаевая, вай гьантрай ва бувсса кьинигу духьувкун.

---

Андриана Аьбдуллаева
Акъахьунссар группалуву цаягу Гулизардул тIааьнсса чIуних вичIи дишин къаччисса, ванил чивчумур буккин гъира бакъасса. МукъучIа ссавур дусса, ихтилатран аьчухсса, гьарнащал маз лякъин кIулсса Гулизар группа хIасул хьуну цалчин­сса гьантрайва ххира хьунни цинявннан. Гьай-гьай, психологрихха. Ванил жун мюнпатсса маслихIатругу байссар.

Гулизар МахIачкъалалив бувкI­сса чIумал, жу ванищал хьунабавкьуру. Ва бувкIссар Ккуркливгу, гьуртту хьуссар Лакрал райондалул юбилейрал шадлугърал мероприятиярттайгу. Гъумукгу Гулизардул хIурмат буллалисса чан­сса бакъая.
Гулизар бур психологиялул элмурдал кандидат, Психологиялул, социологиялул ва социал иширттал институтрал кафедралул доцент, Н. И. Пироговлул цIанийсса Аьрасатнал национал ахттаршиннарал медициналул университетрал аьмсса психологиялул ва педагогикалул кафедралул доцент.
Бувну бур ва 1956 шинал ноябрь зурул 16-нний Буйнакс­калий Хьурттал шяравасса ХIажинал ва Залмул кулпатраву. Гулизардул ппу зий ивкIун ур бухгалтерну личIи-личIисса идарарттай, нину – Щурагьиял детдомрай.

Совет Союзрал Виричу М. ХIажиевлул цIанийсса Щурагьиял 5-мур школа къуртал бувну махъ, Гулизар бувххун бур Дагъусттаннал педагогический институтравун, чил билаятирттал мазурдил факультетрайн, лавсун бур ингилис ва ламса мазрал учительнал пиша. Гулизар институтраву дуклакисса чIумал, философиялул преподавательнал учайсса бивкIун бур: «Ина ляличIисса, аькьлу бусса душ бура, ина чара бакъа гихунмайгу, аспирантуралуву, дуклан аьркинссара», — куну. Гулизардул буттангу му пикри ххуй бивзун бур. Ванин цинма тIурча, ччай къабивкIун бур. Гулизардун 20 шин хьусса чIумал, авария хьуну, ивкIуну ур ванил ппу. Гулизардунгу буттал хиял бартбигьин ччан бивкIун бур.
Аспирантуралувун бувх­сса чIумал ванин 24 шин диркIун дур.

1964-ку шинал Москавуллал педагогический институтрал психологиялул кафедралий аспирантурагу бувккуну, лайкьну дурурччуну дур ванил психологиялул элмурдал кандидат хьунсса диссертация. Мунияр махъ Гулизар зий бивкIун бур Дагъусттаннал педагогический институтраву психологиялул кафедралий, 1996-ку шинал хьуну бур кафедралул доцент.

Гулизар хъанай бур 71 публикациялул автор. Миннуву дур 12 дуккаврил ва методикалул даву, 61 элмийсса даву ва 1 монография. Ва хъанай бур Аьрасатнал национал ахттаршиннарал медициналул университетрал психолого-социал факультетрал ва педиатриялул факультетрал Аьлимтурал советрал член. Гулизар СССР-данул психологтурал обществалул 6-мур съездрал гьурттучири. Ва мукунма гьуртту хьуну бур Аьрасатнал ва Дунияллул халкьуннал дянив­сса личIи-личIисса конференциярттай.
Давриву хьхьичIунну буну тIий, лайкь хьуну бур барчаллагьир­ттан ва дипломирттан. 2019-ку шиная шихунмай ва хъанай бур «Да­гъусттан» Москавуллал культуралул центрданул президиумрал член.
Гулизардул адимина Кьурбангу дурккусса, жяматран бусравсса инсан ур. Ва адвокатри. 1997 шинал увххун ур Москавлив Прокуратуралул НИИ-лул (Научно-исследовательский институт) аспирантуралувун.

Му бувккуну махъ тийхва адвокатуралий зун ивкIун ур. Кулпатрангу тихун бизан багьну бур. Кьурбангу цала даврий хьхьичIунну, хIурматрай ур. Ва цимилагу лайкь хьуну ур АьФ-лул Адвокатътурал палаталул чулухасса ХIурматрал грамотарттан, мукунна Москавуллал областьрал адвокатътурал коллегиялул чулуха ванан дуллуну дур «ХIурматлувсса адвокат» тIисса лишан.
Вайннал бур ца арс ва ца душ.

Арснал Рамазаннул къуртал бувну бур Н. Бауманнул цIанийсса Москавуллал техникалул университетрал гьанусса элмурдал факультет. Му бакъассагу, ванал къуртал бувну бур Москавуллал шагьрулул педагогикалул университетрал психологиялул факультетрал магистратура. Гулизардул цила ниттил ниттин цIа дирзсса душнил Тутубавал (вайннал кутIану ТIутIи учай) ЯтIул дипломрай къуртал бувну бур Пироговлул цIанийсса Аьрасатнал национал ахттаршиннарал медициналул университет. Ванин чIивинияцIава (3 шин хьу­сса чIумалва) цила ниттилссу, Гулизардул хъунмур ссу, ххуй бизлай, хIакин хьун ччай бивкIун бур. ЦIана ва неврологиялул отделениялий каялувшиву дуллай бур.

Вайннал кулпат гьарица шинах бучIай Дагъусттаннайн, бияй, цала миналийн, Хьурттал шяравун бакъассагу, Гулизардул цила оьрчIшиву ларгсса Буйнакск шагьрулийнгу.
Букъавсун къабучIир, «Да­гъусттан» Москавуллал культуралул центрданул тапшур бувну, Гулизардул хъуннасса гьур­ттушинна дуршиву Москавлив ялапар хъанахъисса ва зузисса хьхьичIунсса дагъусттанлувтураясса лу хIадур бавриву. Чивчуну бур цIа дурксса хIакин, Ккурклиятусса ХIажимурад ХIу­сулаевлуя, машгьурсса жула балайчи АхIмад АхIмадовлуя. Луттирал ялув уттигу зийнма бур.
Вай гьантрай Гулизар був­сса кьини дур. ДакIнихтуну барчагу буллай, чIа тIий буру цIуллу-цIакьшиву, талихI-тир­хханну, дуллалимуниву тIай­лабацIу.