Педагог, краевед, чичу ХIажиев Булач Имаду­ттиновичлун гьашину хьунтIиссия 100 шин.

Имара Саидова
Булач ХIажиевлул дагъус­ттаннал тарих лахьхьавриву бивхьусса захIматран буниялагу багьа бакъассар. МукьцIаллахъул шиннардил мутталий Дагъусттаннал телевидениялий най диркIсса Булач ХIажиевлул «В стране легенд и преданий» тIисса передачар­ттайну кIул шайссия агьалинан Дагъусттаннал улклул тарихрая ва багьу-бизулия. Миннуйн чул бищайссия учительтурал ва тарихрал ахттаршинначитурал. Булач ХIажиевлул краеведениялул клубравусса оьрчIру цимилгу гьуртту хьуссар Дагъус­ттаннайхсса археологиялул экспедициярттай.

Республикалул музейрдаву хIакьинусса кьинигу яхьуну бур ванал цала учениктуращалсса краеведениялул экспедициярттай лявкъусса караматсса экспонатру. ЧIава краеведтуращал Булач ХIажиев къаив­сса мурцIу бакъахьунссар щала Дагъусттаннай. Ванал каялувшиндаралусса экспедицияр­тту бивссар Гуржиянавун, Ух­ссавнил АьсатIиннавун, Чачаннавун ва Ингушнавун. Дуклаки оьрчIащал чIярусса шиннардил мутталий дачин дурну уссия Хъун дяъвилий ливтIуми був­ччусса кIанттурду ххал буллали­сса давурттугу. Булач ур 50-нния ливчусса луттирдал автор.
Увну ур Булач Мияйннал шяравасса Имадуттиннул ва Хьуриятусса ХIурубичал кулпатраву май зурул 2-нний 1919 шинал Гъуниннал райондалий. 1930 шинал Щурагь бувккуну бур 5 класс.

Ва чIаванияцIава цимурца кIул хьун ччисса, дуккаврих гъира-шавкь дусса оьрчI ивкIун ур. Булачлун 13 шин хьусса чIумал гьан увну ур Севастополлайсса ЛухIи хьхьирил флотрай къуллугъ буллалисса хъунама уссу МахIаммад ХIажиевлучIан. Оьрмулухунсса дарсну хьуну дур ванан цала хъунама уссу, Совет Союзрал Виричу, цIанихсса моряк-подводник МахIаммад ХIажиевлул жамилий чIава морякну къуллугъ буллан лагаву.
Зана хьуну махъ дуклан ивкIун ур республикалий хьхьичIунми педагогтал зий бивкIсса В. И. Лениннул цIанийсса Буйнакскаллал 1-мур школалий.
Хъун дяъви байбивхьусса цалчинсса гьантрай хушрай дяъвилийн лавгсса Булач зана хьуну ур 1945 шинал август зуруй. Дяъвилий ккаккан дурсса чувшиврухлу, СССР-данул Верховный Президиумрал Советрал ХIукмулийн бувну, дуллуну дур ванан «За Победу над Германией» тIисса медаль.

1947 шинал Дагъусттаннал тарихрал факультетрал ца курс­гу бувккуну, зий ивкIун ур Ахъу­шиял школалий тарихрал дарсирдал учительну. Диплом лавсун махъ зун ивкIун ур Буйнакс­каллал дянивмур даражалул школалий. Ванал 55 шин хьуну дур учительшиву дуллай. Булач ХIажиевлул дарсру дирхьу­сса оьрчIру хIакьинусса кьинигу цанма оьрмулуву хьусса хъунмасса тIайлабацIулун ккалли буллай бур мукунсса учитель цала икIаву. Энциклопедиялул куннасса кIулшивуртту дусса, лавайсса даражалул пишакаршиву дусса Булач ХIажиев щалагу республикалул агьулданун мудангу бусравну ва кьиматрай уссар.

Ва 45-хъул шиннардий каялувшиву дуллай ивкIсса Буйнакскаллал 5-мур школалий­сса краеведтурал клубрал члентурал 400-нин дирсса походру дурну дур щала Дагъусттаннайх. 1952 шинал Булач Имадуттиновичлул сипталийн бувну сакин бувну бивкIссар бу­ттал улча ла­хьхьаврил клуб. Булач ХIажиевлул цIа, Дагъусттаннай дакъассагу, бусраврай кIицI лаглайнма бур республикалул кьатIувгу.

Ванал дакI марцIну був­сса захIматран лавайсса кьимат бивщуссар хIукуматралгу. Булач Имадуттинович ур Дагъусттаннал ва РСФСР-данул лайкь хьу­сса учитель, СССР-данул халкьуннал учитель, Надежда Крупскаял цIанийсса РСФСР-данул ПаччахIлугърал ва С. Стальскийл цIанийсса премиярттал лауреат, мукуна лайкь хьуну ур чIярусса цаймигу хIукуматрал наградарттан.