Циняв школарттай медкабинетру дузал буван ккаккан бунни

Мартрал 27-нний ДР-лул ХIукуматрал батIаврий ххал бивгьунни республикалул школарттаву медициналул кабинетру дузал баврил масъалартту.

БатIаврий хъунмур махъ лавхъунни ДР-лул цIуллушиву дуруччаврил министр Жамалуттин ХIажиибрагьимовлул. Мунал тIимунийну, школарттай дуклаки оьрчIал цIуллушиву ялу-ялун хьхьара хъанай дур. 2018 шинал оьрчIал диспансеризациялул хIасиллайну миннал ссихI ласаврил базурдал азарду дур 13,6%, яруннал диялдакъашивуртту – 10,7%, нярал системалул ва бизу-бикIулул (поведение) чулухасса азарду – 9,5%, эндокриннал системалул азарду – 8,9%, ку-ххюттуканил азарду – 6,1%.

ЦIанасса ппурттуву республикалий школалул медициналул бутIуву ца яла хъунмур захIматшиву хъанай дур школарттаву медициналул кабинетру лапва чансса бушиву. Ми буми кабинетирттавугу чIявуми зий бур лицензия (ихтиярданул чагъар) дакъасса пишакартал. Республикалий бусса цинявппа 1462 школалува медициналул кабинетру бур анжагъ 585 школалий, ягу 40%, лицензия дусса медициналул кабинетру бур школарттай бувагу 66 (4,2%).

Артем Здуновлул тапшур бунни циняв школарттаву медкабинетру дузал буван ва миннуву зузисса пишакартал лицензиярттал щаллу буван.
БатIаврий ихтилат бунни ДР-лул ХIукуматрал Председательнал хъиривчу – дуккаврил ва элмулул министр Уммупазил Оьмаровал. Мунил бувсунни циняв школарттай бакъашиву оьрчIал дукра дукайсса ва хIадур дайсса кIанттурду. Ххал бигьлагьисса масъаларттал хIакъираву ихтилат бунни мукунма ДР-лул Роспотребнадзорданул тарбиялул ва дуккаврил шартIирдал надзорданул отделданул хъунмур Марина Рамазановал.
Артем Здунов тапшур бунни дуклаки оьрчIру ххуйсса щинал дузал буван, Хасавюртлив куннасса иш-тагьар къахьуншиврул.

ХIадур бувссар
ХI. Аьдиловлул

Читайте также: