Дагъусттаннал бурж чан хьуссар 1 млрд. къурушрал

Мартрал 5-нний хьунни ДР-лул БакIчи Владимир Васильевлул каялувшиврий гьарца нюжмардий шайсса оператив батIаву.

Муний республикалул финансирттал министр Юнус Сяъдуевлул бувсунни республикалул бюджетрал кредиторшиврул бурж чан хьуну бушиву 1 млрд. къурушрал.


Дурсса давурттал хIасиллайну Дагъусттаннал Финансирттал министерствалийн циняв министерстварттал буллусса информациялийну бурж хьуну бур 1,6 млрд. къуруш. Муния махъ министерстварттал буллусса документирттал анализ дурну, ДР-лул Финансирттал министерствалул баян бувссар Дагъусттаннал бурж бушиву 1,4 млрд. къурушрал.
Юнус Сяъдуевлул бувсунни цумур министерствалий цуксса бурж буссарив, ми буржру шаврил сававрду. Мунал тIимунийну, ларгсса шинал министерствар­ттал ва ведомстварттал буржру къабувну бур ва ми чангу хьуну бур. ЦIанасса ппурттуву республикалул бюджетрал бурж ливчIун бур 640,5 млн. къуруш.

Буржру шаврил хIакъираву республикалул каялувчинал бувсунни цалвамур пикри: «1,6 млрд. буржирая ливчIун бур анжагъ 640 млн., мунил бусласиссар жула финансирттал министерство зий бушиву, амма жува муданма тIайлану зий ба­къашиву, цанчирча ва тема хIасул хьун къааьркин­ссия. Утти пикри буван аьркинну бур, циванни миллиард къуруш бюджет­раву ккаккан дурну диркIсса. Мичча чIалай бур жура жулла хозяйство къатIайлану дачин дурну бушиву, — увкунни Владимир Васильевлул.
БатIаврий ихтилатру бунни ДР-лул дуккаврил министр Уммупазил Оьмаровал, экономикалул министр ХIусман ХIасбулатовлул ва цайминналгу.