ДР-лул Россельхознадзорданул Управлениялул госинспектортал хъирив бивзун бур Азирбижаннал республикалия ларсун букIлакIисса ххяххия, ахънилсса ва цаймигу карантин баян бувсса кьай-кьуй жула республикалийн итакъадакьаврил ялув.
«Ярагъ-Къазмаляр» Азирбижаннал дазуй къадагъа дирхьусса продукцияртту аьлтту даву мурадрайсса ххал бигьавурттугу ччя-ччяни дай управлениялул зузалтрал.
Гьашинусса шинал сияхIрайн лавсун бур мукунсса продукция ларсун бувкIсса 14 иш. Му дазуйх жула республикалийн ларсун най бивкIун бур карантин баян бувсса кьаркьсса хъюруврал ва шагьнал хъюруврал, люцерналул, кинзалул, укропрал гьаннарду. Вай продукцияртту ларсун наниминначIа къадиркIун дур фитосанитариялул сертификатру ва хасъсса документру.
Къадагъа дирхьусса продукция зана риртун дур махъуннай Азирбижаннал республикалийн.
Имара Саидова
