[dropcap]М[/dropcap]. Горькийл цIанийсса Оьруснал театрдануву Дагъусттаннал паччахIлугърал опералул ва балетрал театрданул ккаккан бунни «Валида» тIисса цIанилусса музыкалул комедия (оперетта), СССР-данул халкьуннал артист Мурад Къажлаевлул чивчусса.

Бадрижамал Аьлиева
Спектакль байбишиннин ихтилат бунни Опералул ва балетрал театрданул президент, АьФ-лул искусствалул лайкь хьусса ишккакку Наида АьвдурахIмановал. Ванил кIицI лавгунни ва спектакль ккаккан буллай бушиву Мурад Къажлаевлун 88 шин хьу­сса таварихрацIун, миннувагу 60 шин цала кулпат – Валида Исламовнащал цачIу оьрму бутлай шаврицIун бавхIуну.

— Валида Исламовна оьрмулул ва творчествалул лахъи­сса шиннардий най бур Мурад МахIаммадовичлущал, хъачIрай хъачI, каний ка дирхьуну. Ва цала 88 шинаву ххаллилну къу­ццу тIий, занакьулу хъанай ушавривугу ванилмур бияла хъунма­ссар, — увкунни ванил.

 Гихунмай Опералул ва балетрал театрданул артистътурал ккаккан бунни «Валида» спектакль. Агьамми ишру хъанай бия шяраваллил школалий дарсру дихьлай ивкIсса угьара хьусса учительнал къушлий. Ванал шанма душнивасса хъунма-хъунмур, буттал тIимуних вичIи дирхьуну, цина къаччиссаннан щар хьуну бухьурча, ванил мюрщими ссурвал  цала тIимуний кьянкьану бавцIуну бур, бу­ттахь цала дакIнил лавсъсса жагьилтуран бакъа къахьунну тIий.

БакIрайва ПатIима буцлай ивкIсса Загидовлул итталун багьлай бур, чурх бувккун, хъунма хьусса мунил чIивимур ссу Валида. Му цила ссияр жагьилли, бакIрал ххуйри тIий, му буцлан икIай ва. Микку душварал буттал учай мунахь мяъна куртIсса махъру: «Валидаяр жагьилсса, бакIрал ххуйсса цамур душ ккавккукун, цира ина зунтIисса», — куну. Валидал, авадансса, махъ нанисса, оьрмулул иялсса босс Загидовгу сан къаувну, язи угьлай бур Мурад тIисса жагьил. Жагь Валида буцлай ура, жагь ванил ссу ПатIима буцлай ура тIий, цанма цумур ччиссарив къакIулну, тийн-шийн тIанкIа тIисса Загидов личIлай ур, цавагу душ къавхьуна, халкь хъяй.

Валидал роль дургьуну бия Мадина Исмяилова, бутталмур роль – МухIсин Камалов, режи­ссер – Ислам Казиев, хореограф – Муса Оздоев, театрданул художествалул каялувчи – Наталья Макеева.

Ва кьини залдануву бия цува Мурад Къажлаев ва ванал оьр­мулул дус Валида.