Дагъусттаннал Росгвардиялул управлениялий хьунни ПаччахIлугърал ялув бацIаврил, лицензияртту ва ихтиярду дулайсса даврил подразделениярттал гьану бивзун 50 шин шаврин хас бувсса мажлис.
Андриана Аьбдуллаева
Дагъусттаннал Росгвардиялул управлениялул хъунама, полициялул генерал-майор МахIаммад Баачиловлул барча бунни подразделениярттал зузалт. Лицензияртту ва ихтиярду дулаврил давриха зузисса центрданул хъунама, подполковник Навруз ХIусайновлун ва паччахIлугърал ялув бацIаврил отделданул хъунама, подполковник Эмир Рамазановлун бахшишру дунни Национал гвардиялул Ухссавнил Ккавкказуллал округрал аьралуннал хъунаманал хъиривчу, полициялул генерал-майор АьбдулхIаким ХIажиевлул чулуха. Мукунна хIурматрал грамотартту дуллунни давриву хьхьичIунсса зузалтран.
ЦIанасса заманнай лицензияртту ва ихтиярду дулаврил давриха зузисса подразделениярттайн чIявусса агьамсса масъалартту тапшур бувну бур, агьалинан паччахIлугърал хIаллихшиннарду даврия байбивхьуну, инсантурал ва организациярдал Аьрасатнал Федерациялул законну дуруччаврил ялув бацIаврийн бияннин.
Ларгсса 2018 шинал Центрданийн, районнайсса отделениярттайн паччахIлугърал хIаллихшиннарду даврил хIакъираву бувкIсса 45636 аьрзлува 40497 аьрза электрон журалий бувкIун бур (89,26%).
ПаччахIлугърал хазналувун дуркIун дур 30 миллиондалия лирчусса пошлинарду. Жавабрайн бувцуну бур 5 азарунния ливчусса инсантал, 80 къуллугъчи ва 8 идара. Аьмну миннай 7 миллиондалия ливчусса аькIри дирхьуну дур.
2017-2018 шиннардий хъуннасса даву дурну дур госконтрольданул отделданул зузалтралгу. Ххал бувну бур 82 ччуччиялул ва энергиялул объект, цукун дуручлай бурив шикку мюхчаншиву дузал даву мурадрайсса тIалавшиннарду ва цуксса мюхчан бувну бурив объектру террорданул иширттая. Ххалбигьавурттал ялун личин дунни тIалавшиннарду къадурурччусса 593 иш. Идарарттал каялувчитурая ми дукьан дансса тIалавшиннарду дунни. Му бакъассагу, сакин бунни 272 азарда къуруш дагьан дуллалисса 211 протокол. Госконтрольданул отделданул сипталий Дагъусттаннал АТК-лул мажлисрай цIакь дунни категория дан багьлагьисса ТЭК-рал (топливно-энергетический комплекс) объектирдал сияхI. СияхIраву бур республикалийсса 210 ТЭК-рал объект.
