Хушрай дуллалисса давуртту чириссар

Ларгсса нюжмардий республикалий хьусса агьамсса мероприятиярттавасса цану хьунни «Ттизаманнул варистал ва миннал хушрай дуллалисса давуртту» тIисса цIанилусса регионнал дянив­сса кIулшивуртту дулаврил форум.

Имара Саидова
Шикку гьуртту хьунни Аьра­сатнал Федерациялул 10-хъул субъектирдаясса 300 волонтер. Форумрал даву сакин дурну дия «ДоброЦентр» тIисса ххушрай дуллалисса давуртту дачин дур­сса центрданул ва Республикалул Жагьилтурал иширттал министерствалул. Мероприятиялул агьаммур мурад бия жагьилтурал дянив хушрай дуллалисса давуртту чялиш дуккан даву ва регионнайсса волонтертурацIа даврил опыт лахьхьаву.

«Аьрасат – ттул тарих» музейраву тIиртIуну дия жагьилтурал цала хушрай дуллалисса давур­ттан хас дурсса проектирдал авадансса выставка. Вайннун кьимат бищун ва форумрал даврил гьурттучитал барча бан бувкIун бия Республикалул жагьилтурал иширттал министр Камил Саэдов, Да­гъусттаннал Региондалий хушрай дачин дурсса давурттал комитетрал секретарь Рашид Аьбдуллаев ва волонтертурал центрдал вакилтал.

— Форумрал лагрулий дуллалисса давуртту цинярда бартлаган дан бюхъаврий рязину ливчIру. Цинявппагу гьуртту хьун бувкIсса жагьилтал бия даврих гъира-шавкь дусса, жяматийсса давурттавух чялишсса гьурттушинна дуллалисса. Хъинну ххуй дирзунни ва форумрай­сса хIакинтурал-волонтертурал суккушиннарду. Жу хIарачат барду личIи-личIисса пишардал волонтертуран ххуллурду тIитIин. Аьрасатнава вайннал даврин кьимат бищун бучIан бувссар хьхьичIунсса экспертътал ва пишакартал. Форумрай щаллу дурну дуссар АьФ-лул субъектирдал волонтертуращал цачIуну проектру сакин дан­сса цинярда шартIру.

Му бакъа­ссагу, шикку вайннан лахьхьин бувантIиссар акцияртту ва хушрай дуллалисса давурттал мероприятияртту низамрай дуллан­сса куц, — увкунни Камил Саэдовлул.
Рашид Аьбдуллаевлул бувсунни форумрай гьурттушинна дан кьамул буллай бивкIшиву 18 шиная 30 шинайн бияннин­сса оьрмулул инсантал. Гьуртту хъанахъими гьарза хъанай байбивхьукун, икьрал дурну дур 14 шинавусса оьрчIругу кьамул бансса.
Ахирданий хьхьичIунсса проектирдал автортуран дуллунни хIурматрал грамотар­тту ва дакIний личIансса бахшишру.