Ихтилат дарурттая буни, бивщунал бя, кьуркьунал тIама къадикIайссар
ПаччахIлугърал Думалул вай гьантрай, Американал санкциярдал жавабран маслихIат бунни тайнначIату нанисса даруртту, хIан ва къалиян жура машан ласласаврий къадагъа дишин.
ПатIимат Рамазанова
[dropcap]А[/dropcap]гарда кьатIаллил билаятирттая дикI, нис ва цаймигу дуки-хIачIия дучIан къадуллай, жулламур промышленность хьхьичIуннай дулларча, тIайлабацIулий бартдигьин бюхъайсса даву духьунссар му. Нис дуван лахьхьин захIмат бакъархха! Дарурттал хIакъиравурив тIурча, къахьунссар му тIайлабацIулий бартдигьин бюхъайсса давур куну учин. Жунма цинявннан кIулли Американал даруртту ххуйсса даруртту бушиву.
Москавуллал сийлийсса ца азарханалий ттухь даруртту маслихIат буллалини, хIакинтурал тIайланма увкуна: «ЖучIа азарханалий жулвасса бакъа даруртту бакъар, американал ягу европаналми даруртту ласунмур бува,» — куну .
Ихтилат цава-цавай дарурттаятур, личIи-личIисса билаятирттай бувайсса. ХIакьину «ОьрчIал дакIру» тIисса фондрай каялушиву дуллалисса Екатерина Берлинт бур жучIава Аьрасатнаву къюкIлил къашавайсса гьарца шамилчинма инсаннан кардиостимулятор аьркинссар, жува кьатIаллил билаятирттал производствалул аппаратруру ишла буллалисса тIий. ХIакинтал бур мукунма гепатит С хъин дувайсса «Совальди» тIисса дарувгу, ВИЧ-рал къашавайминнансса дарурттугу американалми ххуйссар тIий. Циванни, туну, жущава ххуйсса даруртту буллан хъанай бакъанува, цайми билаятирттал бувсса дарурттай къадагъа дишин аьркинссагу?
Щинни зарал хьунтIисса? КьатIаллилми билаятирттайн хъин хъанан гьан къахьунтIими, гьай-гьай, чиновниктал бакъар. Укунмагу чиновниктал чил билаятирттал клиникардайн лечлай бур ца пицIу личирчагума.
Бюхъай аьрасатнал фармаиндустриялуха зузими ххари хьун кьатIаллил билаятирттаясса дарурттайн къадагъа дуваврия. ХIукумат кьатIаллил билаятирттаясса даруртту чанну машан ласласаврийнугу миннал иш танива бавчуну бур.
Амма, ихтилат дарурттая буни, бивщунал бя, кьуркьунал тIама, тIутIаву къатIайлар. ХIакинтал хIарачатрай бур, мяйжанссар, чиновниктуран ва депутатътуран ми дарурттай къадагъа дишаву агьалинан заралну дацIлай душиву бувчIин буван.
