[dropcap]Д[/dropcap]яъвилул гьурттучи, ЧIяйннал шяравасса Рамазанов Абу­тIалиблул бивтун бур къабигьасса, амма пахру бансса оьрмулул ххуллу. АцIния ряхра шинаву, ахьтта, цана цувалу дуклан Щурагьунгу увкIун, хьхьичIунну дугу-дуклай, педучилищалул профсоюзрал организациялул хъунаманугу ивкIун ур.

1937 шинал айивхьуну ур оьрус мазрал ва литературалул учительну зий. Дяъви байбивхьусса кьинива дяъвилийн лавгун ур. Гара шинал, дакIницIун ккулла щуну, ккуллагу чурххаву бунува, талай ивкIун ур. Оьрмулухун му ккуллалущал занайгу ивкIссар. Дяъвилия зана хьуну махъ АбутIалиб личIи-личIисса давурттай зий ивкIун ур: колхозрал, сельсоветрал председательну, райондалул комсомол организациялий ва цаймигу ккалли дан­сса давурттай.
Ванал лях-карах чичайсса диркIун дур мюрщи-хъунисса назмурдугу. Миннувасса цаппара аьлтту дуллай буру «Илчилул» лажиндарайгу.
Баргълагавал чулий –
Немец ххурхху тIий.
Баргъ буккаймур чулий –
Япун гъургъу тIий,
Сситтул ва загьрулул
Бунийх пурха тIий,
Ххявххунни ттул улклуйн
Чапхун дан ччими.

Шагьрурду ппив бунни,
Щархъив ххит дунни,
ОьрчI-хъуни ва хъами,
Гьаксса ливтIунни.
МютIи хьун къаччими
Сагъну бувччунни.
Совет билаятрай
Къирмишан дунни.

Европа щалава
Хъямала бунни,
Зид-зулмулул чарсри
Миннайх ларххунни.
Щалла дунияллул
Заллу-зал хьун ччай,
Гитлер тIисса ца жин
Жуйнма ххявххунни.

Зулмулул аьраллу
Ппив-ххив буванну.
Тархъаншиврул ттугъру
Лахъну гьаз банну.
Ххира Астталиннул
Бюхттулсса амру,
Жува литIурчагу,
Биттур буванну.

Хъамакъаританну дяъвилул дардру

ЛивчIссари ниттихъул
Абад аьтIийнма.
ЛивчIссари щахъами
Щавурду цIалай.

ЛивчIссари бухлавгун
Барххулт-уссурвал,
«Уссай, на бивчIа»! тIий,
Цимигу ссува.

ЛивчIссари цимигу
Ятин ялгъузсса,
Буттал лажин ккаккан
Нясив къархьусса.

ЛивчIссари душругу,
Пардав ччурччуну,
Ччиссаннах ялугьлай
Яру букканнин.
Ппухълуннал кюруй

КIюрххил ххяххабургъийн
Лажин дурургсса,
Кьадрулий хъамалгу
Кьамул бан кIулсса,
Буттал-буттахъайра
Цил цIа машгьурсса,
Инара жул пахру,
Ппухълуннал кюруй.

ЧIяйннал шяравалуй,
Жул зунттал ватан,
БивкIссар вил мудангу
Ххаллилсса агьлу:
Хъу-лухччинул зузалт,
ЗахIмат бан кIулсса
Кьяпрал, чарил, муххал
Магьир усттартал.
ЦIа дурк хIаписартал,
ХIакьсса аьлимтал.
Чувшиву, дусшиву
Дуруччин кIулсса,
Инара жул мурад,
Ппухълуннал кюруй!

Рамазанов АбутIалиб,
ш. ЧIяйми