Олимпиадалий аьрасатлувтурал ларсунни кIира мусил медаль

КIинтнил Олимпиадалул тIуркIурдай Кореянаву Аьрасатнал спортсментурал ларсунни 2 мусил,
6 арцул ва 9 чарвитул медаль, цинярдагу – 17.


ХIасан Аьдилов
Хъаннил цивппалусса фигуралул журалий бигьаврий ххув хьунни Алина Загитова.
Олимпиадалий махъра-махъ­са кьини цинявннаяр ххув хьунни Аьрасатнал хоккеистал.
Му Олимпиадалийн гьан къабивтун бивкIссар жула билаятрал цаппара хьхьичIун итххявх­сса спортсментал: шорт-трекрай укку Виктор Ан, биатлончи Антон Шипулин, лыжардай бигьу Сергей Устюгов ва цаймигу.

Фигуралул журалий бигьаврий Алина Загитовал ларсунни цалчинсса мусил медаль. Евгения Медведевал дурххунни арцул медаль. Миннущал мукунна цачIу Михаил Колядал, Екатерина Бобровал, Дмитрий Соловьевлул, Евгения Тарасовал, Владимир Морозовлул, Наталья Забиякал, Александр Энбертлул командарттал дянивсса бяст-ччаллаву ларсунни арцул медаллу.

Арамтурал хоккейрал турнирданий Аьрасатнал командалул рай къабуллунни царагу командалухьхьун. Ва жулла ххувшаву урчIилчинссар, СССР-данул заманалийссагу хIисавну. Му чулуха жула билаятрал команда архIал дарцIуссар Канаданал командалущал.

Арцул медаллу ларсунни Германиянал цачIундур командалул, цила тарихраву цалчинсса ишгу хьун бувну. Чарвитул медаллу дурххунни Канаданал командалул.
Хъаннил хоккейрал турнирданий ххув хьунни США-нал команда. Тарихраву Аьрасатнал хъаннил командалул цалчинни бувгьусса 4-мур кIану.

Лыжардай бигьаврий Аьрасатнал командалул дурххунни 8 медаль. Мугу тарихраву цалчин хьусса иширан ккаллиссар. Пхенчханнайн жула цаппара хьхьичIунми лыжардай бигьулт къабивкIшиву хIисавравун ласурча, жулва лыжардай бигьулт­рал хъунмасса гьунар ккаккан бувссар.

Ва Олимпиадалий МОК-рал гьуртту хьун ивтун ивкIссар увагу 4 Аьрасатнал биатлончи – Антон Бабиков, Матвей Елисеев, Ульяна Кайшива ва Татьяна Акимова. Вай мукьагу цалчинни Олимпиадалий гьуртту хьусса.

Шорт-трекрай Аьрасатнал командалул ца чарвитул награда ларсунни Сочилул Олимпиадалул чемпион (эстафеталий) Семен Елистратовлул, 1500 метралий левчуну.
Спелетондалий гьуртту хьуну, Никита Трегубовлул ларсунни арцул медаль. Мунал Сочилул Олимпиадалий бувгьуну бивкIссар 6-мур кIану.

Фристайлданий Аьрасатнал спортсментурал ларсунни кIира чарвитул медаль.
Трамплиндалия тIанкI даврил Олимпиадалул турнирданий Ирина Авакумовал бувгьунни 4-мур кIану.