Декабрь зурул 13-15-нний Москавлив хьунни щалагу Аьрасатнал миллатирттал литературалул вакилтал бавтIсса форум. Микку Дагъусттаннаяту гьуртту хьунни ряха инсан: лакрал миллатрал чулуха – Руслан Башаев, даргиял миллатрал чулуха – Хамис Шамилова,
яруссаннал миллатрал чулуха – МахIаммад Насруллаев, лазгиял миллатрал чулуха – Файзуттин Нагиев, къумукьнал миллатрал чулуха – Казим Казимов, табасараннал чулуха – Эльвира Аьшурбекова.
Му хIисав хъанай дур Аьрасатнал паччахIлугърал кьасттирайну сукку дурсса хъуннасса даврил дайдихьуну. Мунин дирзсса аьмсса цIанугу дур «Аьрасатнал Федерациялул халкьуннал миллатирттал литература гьаз даврил программа» тIисса.
Муна му программалул вив сакин дурсса давуну дия ми гьантрай Аьрасатнал хъуншагьрулий бартдиргьусса мероприятиярттугу.
БувкIми циняв цалчинмур кьини цачIун хьуна Холидей Инн тIисса гостиницалул конференц-залдануву. КIул хьуна цаннащал ца, дуруна муницIун дархIусса личIи-личIисса викторинарду, хIадур бувна сакиншиндарал масъалартту.
Муния махъ, шагьрулувух мадарасса манзилгу бивтун, хъамал бувцуну бувкIуна И. Тургеневлул цIанийсса библиотекалувун. Миккусса программа дия хъунмурчIин кIива бутIуя сакин хьусса: 1-мур – «Аьрасатнал мазурдил чIюлушиву» тIисса лекция; 2-мур – Аьрасатнал миллатирттал мазурдий назмурду ккалаккаву.
КIилчинмур бутIул мурад хъинну авадансса ва дакIний личIансса бия. Цаннал хъирив ца сахIналийн гьаз хъанай, 44 миллатрал цIаниясса 44 авторнал бувккуна цалва-цалва мазурдийсса шеърирду – ниттил мазрайгу, оьрус мазрайгу (таржума ягу подстрочник). Кувннал увкуна балайрдугума.
Хъиривмур кьинисса хъунмур мероприятияну дия Аьрасатнал хIакьинусса поэзиялул антологиялул проектрал презентация. Амма муниннин сакин бувну бия «Москва литературная» тIисса шагьрулувухсса экскурсиягу.
Презентация хьуна дунияллий ца яла хъунмурну ва аваданмурну хIисав байсса Аьрасатнал паччахIлугърал библиотекалуву.
Хъинну куртIсса, аьщуй-ххуттай авцIусса «Художественный перевод как основа межнационального единения (история и современность» тIисса цIанилусса доклад бувна шаэр, таржумачи, литературалул чIярусса премиярттал лауреат, цурда Программалулгу сакиншинначитуравасса ца, Максим Амелиннул.
Муния махъ хьуна циняв гьурттусса дискуссия. Ахирданий бия фуршетгу.
Презентациялий ия жура кIицI дурсса Программалул паччахIлугърал чулухасса жаваб дулайсса вакилну ккаккан увсса Сергей Филатовгу, Ельциннул чIумал Президентнал администрациялул каялувчину зий ивкIун, жуна цинявннан кIулсса, бавсса. Муналгу лавхъуна чIиви-хъунсса махъ.
ТIайлабацIу баннав тIий буру ххишала бакъа ххуйсса мурадирай сукку дурсса даврин.
Шиккува хъунмасса барчаллагь учингу ччай буру, му Программалул давривух чялишсса гьурттушивугу дуллай, жула Дагъусттаннайн багьайми масъаларттал ялув личIлулну бавцIусса Миясат Муслимовахь!
Жул корр.
