ИвкIуманаяту ягу ххуйсса учин аьркинссар, ягу цичIаввагу учин къабучIиссар, тIун бикIай. Бюхъай му тIайласса бикIангу. Амма немецнал фашистал ххит бувну 70 шин бартлаглагисса байрандалийн вай ххару чикъавчуну ттуща ацIан къахьунссар.
Циван учирчан, ванияр ца 4-5 шинал хьхьичI АхIмаднабиев АхIмад-Наби тIисса журналистнал, Ххувшаврил 65 шин хьусса байрандалун хас дурсса макьалалуву, чивчуну бия Дагъусттанная цуя-ца инсан цала хушрай (добровольно) дяъвилийн, Совет хIукумат дуруччин къалавгссар тIий, добровольцынан ккалли буллалимигу, НКВД-лул солдатнал штыкирттал хьхьичI бавкьуну най бивкIмири тIий. Ялагу бия чивчуну Гитлердул цува уручлансса батальон ккавкказнал арамтунная сакин бувну бивкIссар, миннайн дакъа вихшалагу къадишайсса диркIссар тIий.
Ци журналист, чичу ухьурчангу, АхIмаднабиевлун дагъусттаннал тарих, хаснува Совет хIукумат дишаврия, Ххувшаврия цичIавгу кIулну бивкIун бакъар. А. Данияловлул «Дагестан в годы ВОВ» тIисса луттирай бур чивчуну «среди лакцев предателей не было» тIий. Мяйжаннугу, цала хушрай дяъвилийн лавгсса лакраву ттуршлийну чIявусса хьуссар. Ца ттул буттал шярава ГьунчIукьатIату 17-18 шинаву лавгсса 44 доброволец ур. Улу Граждан дяъвилул Виричу Кьурбанаьлиев Ибрагьин-Халилгума 51 шинаву цала хушрай лавгун ур душман ххит уллан. Щар къадурцусса 69 жагьилная бачIи ххишала зана къавхьуссар. Зана хьумигу щавурдал къиялул лахъи къалавгссар.
Ва 70 шинал Ххувшаврил юбилейрайн чичлачисса, макьалалуву вай добровольцынал цIа-бакI чичин ччай ура. КIулну бикIан АхIмаднабиев кунмасса «вирттавран» бивкIшиву, мяйжаннугусса, кIарттухалу якъабуллалисса, вирттал.
Зу жун хъамакъабивтссару.
Вана вай 45-гу инсан личIи-личIисса шиннардий цалва хушрай, цала броньгу инкар бувну, дяъвилийн лавгсса.
Вай урчIагу жагьил, 18 шин барткъаларгсса, цалва хушрай 1943 шинал март зуруй дяъвилийн лавгссар. Вайннаща бюхълай бивкIссар къагьанну учин. Военкоматрайн приказ бувкIун бивкIссар 18 шин къархьума къауцин. Амма вай лавгссар ватан дуруччин: АхIмадов Ширвани, ХIажимирзаев Жамалуттин, Ибрагьимов Наби, Ибрагьимов Зарип, Къардашов Жабраил, Къардашов Якьув, Мигьруев МахIаммад, МахIаммадов М-Мирза, Сулайманов Кагьабуттин.
Хъамамабитару жулла хIукумат душманная дурурччусса вирттал.
Амин Аьбдуллаев
